لندن ۔ 9 جنوری (اے پی پی) برطانوی شاہی خاندان دے شہزادہ ہیری اتے میگھن اعلان کیتے جو او سینئر شاہی حیثیت توں دستبردار تھیندے پن تے مالی طور تے خود مختار تھیونڑ کیتے اقدامات کریسن ۔ برطانوی نشریاتی ادارے دے مطابق شاہی جوڑے اپنڑے انسٹاگرام پیج تے وی پوسٹ کیتے گے بیان اچ آکھیے جو انہاں کئی مہینے تئیں غور کرنڑ تے سانجھے صلاح مشورے دے بعد اے فیصلہ کیتے ۔بیان اچ شاہی جوڑے آکھیے جو اساں شاہی خاندان دے سینئر ارکان دی حیثیت توں دستبردار تھیونڑ تے مالی طور تے خود مختار تھیونڑ دا ارادہ رکھیندون ، جڈاں جو اساں ملکہ برطانیہ دی پوری معاونت تے حمایت جاری رکھیسوں ۔ انہاں آکھیے جو او برطانیہ اتے شمالی امریکہ اچ وقت گزارنڑ دا ارادہ رکھیندن تاں جو او ملکہ برطانیہ، دولت مشترکہ، اتے شاہی خاندان دی سرپرستی اچ اپنڑے فرائض دی انجام دہی اتے انہاں دا احترام کریندے رہسن
