ملتان ۔ 3 جون (اے پی پی) سرائیکستان قومی کونسل دے چیئرمین ، سرائیکی وسیب دے جگ مشہور سرائیکی محقق، دانشور تے ماہر تعلیم پروفیسر شوکت مغل 73 سال دی عمر اچ رضا تھی گئے ، او کجھ ڈینھ توں بیمار ہن۔ شوکت مغل 4 جون 1947ءکوں پاک گیٹ ملتان اچ جمیے۔ انہاں دے والد نام حسین بخش ہا۔ شوکت مغل نے میٹرک ملت ہائی سکول کچہری روڈ توں 1963ءاچ کیتا۔ 1965ء اچ گورنمنٹ ایمرسن کالج توں ایف اے اتے 1967ءاچ ایں کالج توں گریجویشن کیتی۔ علوم اسلامیہ اچ ایم اے دا امتحان 1969ئ اچ پنجاب یونیورسٹی توں پااس کیتا۔ 1971ءاچ ایم اے اردو کیتا۔ ایں توں پہلوں 1968ئ اچ ای او بی ایڈ کرن دے بعد شعبہ تدریس نال ج±ڑ گئے۔1975ئ تک انہاں سکول اچ پڑھیا جیندے بعد لیکچرار دے طور تے انہاں دی کالج اچ تقرری تھی گئی۔ 1975ءتوں 2007ئ ئ تک او کالج اچ ا±ردو پڑھیندے ریہے اتے نال نال تحقیقی کم وی جاری رکھیا۔ شعرو ادب دے نال ج±ڑت کالج دے زمانے توں ہی ہئی۔ پروفیسر شوکت مغل دیاں وکھو وکھو موضوعات تے 70 کتاباں شائع تھیاں اتے جیندے وچ 50 کتاباں سرائیکی لسانیات تے مشتمل ہن۔ ۔ سرائیکی لغت ، سرائیکی لسانیات ، سرائیکی محاوریاں تے ضرب المثل تے انہاں دیاں کتاباں خاص طور قابل ذکر ہن۔ انہاں دیاں کتاباں اچ ملتان دا سرسید، مرزا مسرت بیگ، “قدیم ا±ردو لغت اور سرائیکی زبان”،” سرائیکی قاعدہ” ، ” اردو میں سرائیکی زبان کے انمٹ نقوش، ” سرائیکی اکھان (تین جلدین ، ” سرائیکی محاورے” (دو جلدیں)، سرائیکی مصادر” (ایک جلد) “سرائیکی زبان میں کنایہ اور قرینہ ” ، ” قدیم سرائیکی اردو لغت”، شوکت اللغات” تے “اصلاحات پیشہ ورانہ” قابل ذکر ہن۔ انہاں لغت دے حوالے نال وکھو وکھ کتاباں دے ترجمے وی کیتے۔ سرائیکی سفرنامیں اچ “دلی ڈھائی کوہ”،” ملتان توں پٹیالے تئیں” اتے بئیاں کتاباں اچ “الف بے بٹوہ”،” کنائی “، ” افادات” اتے “پچھیرا” شامل ہن۔ شوکت مغل کوں انہاں دیاں کجھ کتاباں تے اعزازات توں وی نوازیا گیا۔
