اسلام آباد ۔ 3 جون (اے پی پی) سرائیکی عوامی تریمت تحریک دی نائب صدر ادی نینا سرائیکی ادب دے دانشور سئیں شوکت مغل دی وفات تے افسوس کریندے ہوئے آکھئے قلم قبیلے دے مہاندرے اڳواݨ، جڳ مشہور ماہر لسانیات، سرائیکی تے اردو ادب دے عظیم لکھاری تے ماء دھرتی دا ماݨ پروفیسر شوکت مغل سئیں جھوک لݙا ڳئین…
پرفیسر شوکت مغل سئیں سرائیکی ادب دے آسمان دا چندر ہن، 50 توں ودھ کتاباں آپݨی نسل کوں دان کر آہیں جھوک لڈا گئین ، بقول محترم ظہور دھریجہ سئیں، پروفیسر صیب دی ہک کتاب چھپدی پئی ہوندی ہئی تے او ٻئی کتاب دی تیاری شروع کرݙیندے ہَن. اڄوکے آپ تڑاپی دور اچ جݙاں جو لوک مال ودولت بݨاوݨ تے ودھاوݨ کیتے تݨدِیں تݨدِیں دھرتی دا رزق تھی ویندن مگر آپݨیں اَکھیں دے پپلیاں نال سرائیکی اکھر چُݨ پچُݨ، ول انہاں کوں ٹھاہا، بݨا تے کتاب دی شکل ݙے تے وسیب واسیں کوں دان کرݨ پروفیسر شوکت مغل سئیں دی حیاتی دا مشن تے مقصد رہ ڳئے. اُنہاں دیاں علمی، ادبی تے تعلیمی خدمات سمورے ملخ تے قوم کیتے اثاثہ ہِن. اڄوکے دور اچ قوم تے زبان سانگے اینجھاں بے لوث قربانیاں ݙیوݨ آلیں دا کال اے، اُنہاں دیاں ادبی خدمات گھپ اندھارے اچ سوجھلے دی لاٹ ہِن، جِنھاں توں آوݨ آلیاں نسلاں وی سوجھلے دی اسیس پیسِن، انشااللہ. اُنہاں دے وچھوڑے تے سموری قوم ارمانی اے، ݙکھ دی ایں گھڑی تے صدمے تے سرائیکی عوامی تریمت تحریک سمورے وسیب نال مکاݨی اے..!
رب سوہݨے دا بخش ہوونیں.
