اسلام آباد ۔ 27 اپریل (اے پی پی) وفاقی وزیر دفاعی پیدوار رانا تنویر حسین آکھیا جو شوکت خانم دی زکواة صدقات دی رقم آف شور کمپنیاں اچ ڈبا ڈتی گئی اے،عمران خان وزیر اعظم بنڑنڑ دے خواب ڈیکھنڑ چھوڑ ڈیون،انہاں دی واری کڈاہیں کائنا امسی،پانامہ لیکس اچ وزیر اعظم نواز شریف دا ناں کتھائیں وی کائنی،وزیر اعظم خود کوں اتے آپنڑے ٹبر کوں ہر قسم دے احتساب سانگے پیش کر ڈتے،حکومت پانامہ لیکس بارے کمیشن دی رپورٹ کوں منظر عام تے گھن امسی۔عمران خان اصل اچ پریشان ایں گالھ تے ہن جو اگر اجوکی حکومت آپنڑی پنج سالیں دی مدت پوری کر گھدی تاں عوامی تے فلاحی میگا منصوبے 2018ء اچ انہاں کوں ناکامی توں ڈو چار کر ڈیسن۔گوادر بندرگاہ آندے سال اچ پوری اتے فعال تھی ویسی۔او اسلام آباد اچ میڈیا نال گالھ مہاڑ کریندے پئے ہن ۔انہاں آکھیا جو ماضی اچ شریف فیملی دے کاروبار کوں ہدف بنڑایا گیا،سابق صدر پرویز مشرف ساری حداں تروڈ ڈتن ۔وفاقی وزیر آکھیا جو وزیر اعظم انہاں تے لاتے گئے الزامات دی تحقیقات سانگے کمیشن بنڑاونڑ دا اعلان کیتے اتے ایں سانگے بہترین ٹر م آف ریفرنسز(ٹی او آر) بنڑائے گئین جنہاں دا دائرہ کار وسیع اے ۔
