اسلام آباد ۔ 18 مئی (اے پی پی) وفاقی وزیر منصوبہ بندی تے ترقی احسن اقبال پاکستان اتے چین دے سفارتی تعلقات دی 65ویں سالگنڈھ تے پوری قوم کوں مبارک ڈیندیں ہوئیں آکھیا جو قتصادی راہداری منصوبہ نال چین نال تعلقات ہمالیہ توں ودھ کراہیں ستاریاں تئیں پج گئن ،منصوبہ ملک دشمناں دی اکھ اچ ایں سانگے کھٹکدے کیونجو ایں منصوبہ پورا تھیونڑ نال پاکستان نہ صرف اقتصادی لحاظ جڈانجو دفاعی لحاظ نال وی بہوں مستحکم تھیسی،دنیا کوں اے سنھیا ڈیونڑاں اے جو پاکستان اچ ہنڑ سیاسی رشہ کشی اتے میوزیکل چیئرز دے کھیڈ ماضی بنڑ گئن ،ہنڑ اتھاں سیاسی استحکام اے،دنیا دے سرمایہ کار پاکستان اچ آ کراہیں سرمایہ کاری کرن۔۔ ”اے پی پی” کوں خصوصی انٹرویو ڈیندیں ہوئیں انہاں آکھیا جو پاکستان اتے چین دی یاری دنیا اچ مثال اے ،65سالیں اچ پاکستان دا چین ہر اوکھے ویلھے ساتھ ڈتے اتے پاکستان وی ہر فورم تے چین نال یاری دا حق نبھائے۔ایہو وجہ اے جو ایں یاری کوں ہمالیہ توں اُچی،گھاٹے سمندر توں گھاٹی اتے مٹھی ماکھی توں مٹھی آکھیا ویندے،البتہ ایں یاری اچ ہک گھٹکی ہئی جو اتھاں اساں سیاسی محاذ تے بہوں نیڑے ہاسے،اقتصادی سطح تے وی ایں یاری کوں اساڈی حکومت اقتدار اچ آونڑ دے بعد چین نال یاری کوں ہک اقتصادی پارٹنر شپ اچ تبدیل کیتا۔ہک سوال دے جواب اچ انہاں آکھیا جو پاک چین اقتصادی راہداری نال ایں خطہ دی جیو اکنامکس بدل ویسی اتے سٹیٹس کوں وی تبدیلی واقع تھیسی جئیں پاروں پاکستان کوں جنوبی ایشیاء اتے وسطی ایشیاء اتے چین بارے ہک کلیدی کردار حاصل ہوسی۔پاکستان دی معیشت مضبوط تھیسی ۔
