اسلام آباد ۔ 22 مئی (اے پی پی) وفاقی وزیر منصوبہ بندی و ترقی احسن اقبال پاکستان اتے چین دے سفارتی تعلقات دی 65 ویں سالگرہ تے ساری قوم کوں مبارخ دیندے ہوئیں آکھے جو پاک چین اقتصادی راہداری منصوبے پاروں چین دے نال تعلقات ہمالیہ توں اوچے تھی تے ستاریاں تئیں پج گئے ہن ، سی پیک منصوبہ ملک دشمناں دی اکھ اچ ایں سانگے کھٹکدا ہے کیونجو ایں منصوبے دے پورے تھیونڑ نال پاکستان نہ صرف اقتصادی جڈانجو دفاعی لحاظ نال بہوں مستحکم تھی ویسی ، پوری قوم کوں باہمی اتحاد اتے یکجہتی دے نال رل تے ایں منصوبے کوں پورا کرنڑاں چاہیدے اتے سار ی دنیا کوں اے سنیہا ونجے جو پاکستان اچ ہنڑ سیاسی رسہ کشی اتے میوزیکل چیئرز دے کھنڈ ماضی بنڑ گئے ہن ، ہنڑ اتھاں سیاسی استحکام ہے، دنیا دے سرمایہ کار پاکستان اچ آ تے سرمایہ کاری کرں۔ ”اے پی پی” کوں خصوصی انٹرویو ڈیندے ہوئیں احسن اقبال آکھیا جو پاکستان اتے چین دی دوستی دنیا اچ ہک اکھانڑ ہے ، 65 سالیں اچ چین پاکستان دا ہر اوکھے ویلے اچ غیر مشروط ساتھ ڈتے اتے پاکستان وی ہر فورم تے چین دے نال دوستی دا حق نبھایا ہے۔ ایں پاروں ایندی دوستی کوں ہمالیہ توں اوچا ، گہرے ترین سمندر توں گہری اتے میٹھی ترین ماکھی توں میٹھی آکھیا ویندے ۔ البتہ ایں دوستی اچ ہک پہلو دی کمی ہئی جو جتھاں اساں سیاسی محاذ تے بہوں نیڑے ہاسے ، اقتصادی سطح تے وی ایں دوستی کوں اساڈی حکومت برسر اقتدار آ تے چین دے نال دوستی کوں ہک اقتصادی سانجھے داری اچ وٹایا ہے ۔ انہاں آکھیا جو پاک چین اقتصادی راہداری منصوبے پاروں چین پاکستان اچ ساریاں توں ودھ سرمایہ کاری کرنڑ آلا ملک بنڑ گئے اتے ڈوہائیں ملکاں دے اقتصادی تعلقات بہوں تکھے ترقی کریندے پئے ہن ۔ ہک سوال دے جواب اچ احسن اقبال آکھیا جو پاک چین اقتصادی راہداری نال ایں خطے دی جیو اکنامکس صورتحال تبدیل تھی ویسی اتے سٹیٹس کو اچ وی تبدیلی واقع تھیسی ، جیئں پاروں پاکستان کوں جنوبی ایشیاء اتے وسطی ایشیاء اتے چین دے حوالے نال ہک اہم کردار حاصل ہوسی ۔ پاکستان دی معیشت مضبوط تھیسی ، اساڈی اقتصادی ترقی دا پہیہ بیا چلسی تاں یقیناً ایندے نال اساڈی دفاعی صلاحیت وی مستحکم تھیسی ، ایںسانگے پاکستان دے دشمناں کوں اے منصوبہ کھٹکدا پئے ۔ اس منصوبے نال پاکستان کوں ایں خطے اچ ہک مرکزی حیثیت حاصل تھی ویسی ۔ ہک بئے سوال تے جواب اچ احسن اقبال آکھیا جو ملک دیاں سیاسی طاقتاں دی ذمہ داری ہے جو اساں ایں گالھ کوں محسوس کروں جو اج دی دنیا مقابلے اتے اقتصادیات دی دنیا ہے،جیہڑے ملک دی معیشت مضبوط ہے اوندی خود مختاری ہے اتے اوندی دنیا اچ عزت تے وقار ہے۔
