ٹوکیو ۔ 25 مئی (اے پی پی) جاپان دے وزیر خارجہ اپنڑے ملک تے امریکا دی ایٹمی بمباری کوں عالمی قنوناںاتے انسانی حقوق دی کھلی خلاف ورزی قرار ڈتا ہے۔صدر براک اوباما دے دورہ ہیرو شیما دے موقع تے اپنڑے ہک بیان وچ جاپان دے وزیر خارجہ فومیوکیشیدا آکھیا جو ہیروشیما اتے ناگا ساکی تے امریکا دی ایٹمی بمباری وچ ان گنڑجاپانی شہری مارے گئے ہن اتے انہاں دے ملک کوں انتہائی ناگوار انسانی المیے دا سامنڑا کرنڑپیا ہا۔جاپان دے وزیر خارجہ دا آکھنڑ ہا جو شروع توں ای انہاں دی حکومت دا موقف ایہو رہیا ہے جو ، امریکا دی ایٹمی بمباری انسانی حقوق دے حوالے نال بین الاقوامی قنوناں دی خلاف ورزی ہے۔جاپانی وزیر خارجہ دا اے بیان ایجھے ویلھے سامنڑے آیا ہے جڈاں امریکا دی ایٹمی بمباری دے متاثرین اتے مرنڑ آلیاں دے اہل خانہ ولوںا یہ مطالبہ شدت اختیار کرگئے جو صدر براک اوباما کوں ایٹمی بمباری دی بابت تے جاپان کنون معافی منگڑیں چاہیدی ہے۔ایہ گالھ قابل ذکر ہے جو ڈوجھی جنگ عظیم دے دوران امریکا دی ایٹمی بمباری وچ 2 لکھ بندے لقمہ اجل بنڑ گئے ہن جڈانجو ودھ سارے لوک تابکاری اثرات دی وجہ نال انجھ انجھ بیماریاں اتے مشکلات دا شکار ہن۔امریکا اپنڑے ایں غیر انسانی فعل تے اج تئیں معافی نی منگی۔
