اسلام آباد ۔ 12 مئی (اے پی پی) صدرمملکت ممنون حسین آکھیا ہے جو حکومت اقتصادی بحالی سانگے کوششاں دے نال نال ماس ٹرانزٹ سسٹم اتے صحت تے تعلیم دے شعبے سمیت عوامی فلاحی منصوبہ جات تے توجہ ڈیندی پی ہے ۔انہاں اے گالھ گزریل رات ایوان صدر اچ لاہور چیمبرآف کامرس اینڈانڈسٹری اچیومنٹ ایوارڈزدی ونڈ دی تقریب توں خطاب کریندے ہوئیں کیتی ۔ انہاں آکھیا جو لاہور اتے اسلام آباداچ میٹرو بس سروس دی تکمیل دے بعد ملتان اتے کراچی اچ وی نویں ماس ٹرانزٹ منصوبہ جات تے کم جاری ہے ۔ صدرآکھیا جو حکومت دیاں دانشمندانہ اقتصادی پالیسیاں پاروں ملک اچ صورتحال چنگی تھیندی پی ہے ، آونڑ آلے ڈینہاں اچ مزید بہتری امسی۔ صدرآکھیا جو پاک چین اقتصادی راہداری دے فعال تھیونڑ نال پاکستان اچ وسیع تر غیرملکی سرمایہ کاری اتے کاروباری سرگرمیاں کوں تقویت ملسی ۔ انہاں آکھیا جو ماضی اچ دہشت گردی اتے امن وامان دی صورتحال باہرلی سرمایہ کاری اتے کاروباری سرگرمیاں وچ وڈی رکاوٹ رہی ہے ،انہاں آکھیا جو قومی لائحہ عمل نال چاتے گے اقدامات پاروں دہشت گرداں دی چیل ترٹ گی ہے ۔ صدر آکھیا جو حکومت وی ایں ضمع اچ ہک جامع پالیسی ڈیندی پئی ہے ، صنعتکاراں اتے برآمد کنندگان کوں ایندے توں فائدہ چاونڑاں چاہیدے۔ایں موقع تے صدر لاہور توں منتخب کاروباری افراد اچ اچیومنٹ ایوارڈز وی ونڈیے اتے لاہور چیمبردے صدر محمد ارشد اتے سینئر نائب صدر الماس حیدر وی تقریب توںخطاب کیتا ۔
