نیویارک ۔ 24 مئی (اے پی پی) عالمی ادارہ صحت دا آکھنڑ ہے جو مچھراں تے قابو پاونڑ وچ ناکامی دی قیمت زیکا وائرس دے کھنڈنڑ دی صورت وچ بھرنڑی پوندی پی ہے۔عالمی ادارہ صحت دی ڈائریکٹر ڈاکٹر مارگریٹ چان ہک کانفرنس نال خطاب کریندے ہوئیںآکھیا جو 1970 دی دہائی وچ ماہرین انہاں مچھراں تے قابو نی کر سگے جنہاں وچ زیکا وائرس ہائی۔انھاں آکھیا جو اایں ویلھے 60 توں ودھ ملکاں وچ زیکا وائرس موجود ہے اتے حال وچ مچھراں دے کٹنڑ نال کھنڈنڑ آلا ایہ وائرس افریقہ تئیں پج گیا ہے۔ڈاکٹر مارگریٹ چان دا آکھنڑ ہے جو ایں وبا دے کھنڈنڑ نال ا یہ ظاہر تھیندے جو ایندے نال نبڑن سانگے اساڈی اجتماعی کوششاں تے تیاریاں وچ گھٹکی یا خرابی ہے۔انھاں آکھیا جوزیکا نال ایہ گالھ وی ظاہر تھی ہے جو ساریں کوں ہکو جئے طریقے نال خاندانی منصوبہ بندی توں متعلق خدمات تئیں رسائی نی ڈتی گی۔انھاں دا آکھنڑ ہا جوایں وباءتوں جان چھڑاونڑدی مہم امریکی ملکاں وچ کامیاب رہی اتے ایں مہم دے دوران 1962 وچ 18 ملکاں ایں کیڑے توں نجات حاصل کر گھدی ہائی۔واضح رہوے جو ایں وائرس نال حمل دے دوران بالیں وچ شدید پیدائشی نقائص پیدا تھی سگدے ہن اتے زیکا وائرس کوں عالمی سطح تے صحت عامہ سانگے خطرہ قرار ڈتا گئے۔
