اسلام آباد ۔ 21 مئی (اے پی پی) وفاقی وزیر اطلاعات و نشریات سینیٹر پرویز رشید آکھے جو پاک چین تعلقات باہمی اعتماد اتے امن تے ترقی دیاں سانجھیاں کوششاں تے کھڑے ہن ، موجودہ حکومت انہاں تعلقات کوں بیا مستحکم بنڑاونڑ کیتے سارے وسائل استعمال اچ گھن امسی ، پاک چین اقتصادی راہداری خطے اتے عالمی سیاست اچ پاکستان دی اہمیت اچ ودھارا کریسی ، انفراسٹرکچر دی ترقی ڈوہائیں ملکاں وچال اقتصادی اتے تجارتی ترقی اچ ریڑھ دی ہڈی دی حیثیت رکھیندی ہے ، ڈوہائیںملکاں وچال سفارتی تعلقات دے قیام توںگھن تے ہنڑ تئیں نمایاں کامیابیاں حاصل کیتیاں ہن ، اتے ہنڑ اساڈی مثالی دوستی سٹریٹجک سانجھے داری اچ تبدیل تھی گئی ہے ۔ او چھنڑ چھنڑ کوں اتھاں لوک ورثہ اچ پاکستان اتے چین دے سفارتی تعلقات دی 65ویں سالگرہ دے موقعے تے ڈو ڈینھ دے چینی میلے دی افتتاحی تقریب نال خطاب کریندے پئے ہن ۔ ایں موقعے تے چینی سفیر سن وی ڈونگ، انہاں دی ذال بائو ژی چنگ اتے ایگزیکٹو ڈائریکٹر ڈاکٹر فوزیہ سعید وی موجود ہن ۔ سینیٹر پرویز رشید آکھیا جو چین اتے پاکستان سیاسی، فوجی، سفارتی اتے ثقافتی شعبیاں سمیت سائنس تے ٹیکنالوجی اچ وڈی سطح تے تعاون کیتے ، ڈوہائیں وچال سفارتی تعلقات دے قیام توںگھن تے ہنڑ تئیں نمایاں کامیابیاں حاصل کیتیاں ہن انہاں آکھیا جو اوں ویلے جڈاںعالمی اتے علاقائی گردوپیش اچ وڈتیاں تبدیلیاں آندیاں پن اتے اساں سدا بہار سٹریٹجک پارٹنرشپ کو ںبلندیاں دی نویں سطح تے گھن ونجڑ دا عزم کر رکھے ۔ وزیر اطلاعات آکھیا جو شاہراہ ریشم دے2000سالہ قدیم منصوبے تے نظرثانی دے موجودہ اقدام نال پاکستان سمیت کئی ملکاں وچال قربت اتے تعاون کوں ودھار ملسی ، انہاں آکھیا جو پاک چین اقتصادی راہداری نہ صرف ہک سڑک ہے جڈانجو تجارتی، سیاسی، سٹریٹجک سرمایہ کاری ہے جو خطے اتے عالمی سیاست اچ پاکستان دی اہمیت اچ ودھارا کریسی ۔ انہاں آکھیا جو پاکستان اتے چین مارچ1965 ء اچ ثقافتی معاہدے تے دستخط کیتے گئے ، 2014 ء اچ چین دے سینٹرل ٹیلی ویژن اتے پاکستان ٹیلی ویژن کارپوریش لمیٹڈ براڈکاسٹنگ دے شعبے اچ باہمی تعاون دی ہک باہمی یادداشت تے دستخط کیتے ہن ۔ وفاقی وزیر آکھیا جو ڈوہائیں ملکاں دی میڈیا اتے براڈ کاسٹنگ وچال تعاون اتے میڈیا تے پرسنز دے تبادلیاں اچ ہر ڈینھ ودھارا تھئے ۔ انہاں آکھیا جو میکوں ایں گالھ تے پکا یقین ہے جو ڈوہائیں ملکاں دے لوکیں وچال چنگی ہم آہنگی ہی پائیدار تے ٹھوس تعلقات دی ضمانت ہے۔ انہوں آکھیا جو وزیراعظم محمد نواز شریف دی حکومت چینی لوکیں اتے حکومت دے نال تعلقات کوں بیا مستحکم بنڑاونڑ کیتے سارے وسائل استعمال اچ گھن امسی ۔ ایں توں پہلے سینیٹر پرویز رشید ڈو دینھ دے ایں میلے دی افتتاحی تقریب اچ شرکت تے چینی سفیر اتے انہاں دی ذال دا شکریہ ادا کیتا۔ ایں موقعے تے چینی سفیر سن وی ڈونگ آکھیا جو اج دا ڈینھ پاک چین دوستی کیتے بہوں اہم ہے کیونجو اج توں 65 سال پہلے ڈوہائیں ملکاں وچال سفارتی تعلقات شروع تھئے ہن ۔تقریب دے بعد وفاقی وزیر اطلاعات و نشریات سینیٹر پرویز رشید اتے چینی سفیر مختلف سٹالاں دا دورہ کیتا۔
