اسلام آباد ۔ 6 جون(اے پی پی) وفاقی وزیر تحفظ قومی خوراک سکندر حیات بوسن وفاقی بجٹ برائے مالی سال2016-17 اچ کساناں سانگے خصوصی مراعات کوں چنگاں قرار ڈتا ہے ۔ پی ٹی وی نال گالھ مہاڑ کریندے ہوئیں انھاں آکھیا جو وفاقی حکومت کساناں دی اوکھ کوں سامنڑے رکھیندے ہوئیں زراعت سانگے ودھ توں ودھ مراعات دا اعلان کیتا ہے ،انھاں آکھیا جو بجلی کھاد اتے کیڑے مار دوائیں دیاں قیمتاں اچ گھٹکی نال کساناں کوں ودھ ساریاں سہولتاں ملسن ،انھاں آکھیا جو بنکاں دے ذریعے کساناں کوں 7سو ارب روپے دے قرضے ڈتے ویسن جیں نال کساناں دی معاشی حالت چنگی تھیسی ،ہک سوال دے جواب اچ انہاں آکھیا جو زراعت ہک اہم ملکی شعبہ ہے اتے ایندے تے سیاست نی کیتی ونج سگدی ۔سکندر حیات بوسن آکھیا جو وزیراعظم زراعت دے شعبے دی ترقی سانگے خصوصی مراعات ڈیونڑ دی ہدایت کیتی ہئی تاں جوکساناں دی معاشی حالت چنگی تھی سگے ۔
