لاس اینجلس ۔ 21 جون(اے پی پی) کوپا امریکہ فٹ بال کپ دی سیمی فائنل لائن اپ مکمل تھی گئی، لاسٹ فور مرحلے دا آغاز (اج) منگل توں تھیسی، پہلے سیمی فائنل وچ میزبان امریکہ کوں ارجنٹائن دا چیلنج درپیش ہو سی۔ امریکا وچ جاری ایونٹ چھیکڑی مراحل آلے پاسے گامزن ہے اتے چار ٹاپ ٹیماں عمدہ کارکردگی دی بدولت سیمی فائنل وچ جاہ بنڑائی ہوئی ہے جیندے وچ دفاعی چیمپئن چلی، ارجنٹائن، امریکا اتے کولمبیا شامل ہن۔ ایونٹ دے پہلے سیمی فائنل وچ اج منگل کوں ارجنٹائن اتے امریکا دیاں ٹیماں مدمقابل ہوسن، ڈوجھا سیمی فائنل 22 جون کوں دفاعی چیمپئن چلی اتے کولمبیا وچال کھیڈیا ویسی۔ ڈو ٹاپ ٹیماں وچال فائنل 26 جون کوں کھیڈیا ویسی۔
