اسلام آباد ۔ 20 جولائی (اے پی پی) صدر مملکت ممنون حسین آکھے جو حکومت بلوچستان کوں ملک دے بئے علاقیاں دے برابر گھن آونڑ کیتے پرعزم ہے اتے صوبے دے عوام دا معیار زندگی اوچاکرنڑ کیتے ترقیاتی کماں تے توجہ ڈتی ہوئی ہے ۔ انہاں اے گالھ سپیکر بلوچستان اسمبلی راحیلہ حمید خان درانی نال گالھ مہاڑ کریندے ہوئیں آکھی،جنہاں بدھ کوں ایوان صدر اچ انہاں نال ملاقات کیتی۔ صوبے اچ امن و امان دی بہتر صورتحال تے تسلی دا اظہارکریندے ہوئیں صدر مملکت آکھیا جو گوادر بندرگاہ دے فعال تھیونڑ اتے پاک چین اقتصادی راہداری دی تکمیل نال بلوچستان اچ ترقی تے خوشحالی دے نویں رستے کھلسن۔ انہاں آکھیا جو بلوچستان اچ کاروباری اتے تجارتی سرگرمیاں دی بحالی نال روزگار دے موقعے پیدا تھیسن اتے صوبہ ترقی دے رستے اُتے ٹر پوسی ۔ صدر صوبے اچ جمہوری روایات دے بئے استحکام اچ سپیکر بلوچستان اسمبلی دی حیثیت نال محترمہ راحیلہ حمید خان درانی دے کردار دی تعریف کیتی ۔
