اسلام آباد ۔ 3 اگست (اے پی پی) وزیراعظم محمد نواز شریف آکھے جو آزاد کشمیر دی نویں منتخب حکومت کوں ریاست دے امور چنگے بنڑاونڑ دیاں کوششاں اچ ہرممکن کوششاں اچ تعاون ڈیسوں۔ او بدھ کوں اتھاں آزاد کشمیر دے نویں منتخب وزیراعظم راجہ فاروق حیدر خان نال ایوان وزیراعظم اچ ملاقات اچ گالھ مہاڑ کریندے پئے ہن ۔ ایوان وزیراعظم توں جاری پریس ریلیز دے مطابق ایں موقعے تے وفاقی وزیر اطلاعات و نشریات سینیٹر پرویز رشید اتے وزیراعظم دے معاون خصوصی ڈاکٹر آصف کرمانی وی موجود ہن ۔ وزیراعظم نواز شریف راجہ فاروق حیدر خان کوں آزاد کشمیر دا وزیراعظم منتخب تھیونڑ تے مبارخ ڈتی اتے ایں امیدا دا اظہار کیتا جو نویں منتخب حکومت آزاد کشمیر دے لوکیں دی ترقی اتے خوشحالی کیتے ودھ سار ی محنت کریسی ۔ وزیراعظم آکھیا جو آزاد کشمیر دی عوام اساڈے منشور تے بھرپور اعتماد دا اظہار کیتے اتے ہنڑ اے اساڈی اجتماعی ذمہ داری ہے جواساں انہاں دی خدمت کروں۔ ترقیاتی اتے ڈھانچہ جاتی منصوبیاں دے موثر عملدرآمد اتے انہاں دی تکمیل ویلھے سر تھیونڑ یں چاہیدی ہے تانجو آزادکشمیر دے لوک اساڈے ترقیاتی ایجنڈے توں فیدہ چاء سگن۔ وزیراعظم نواز شریف آکھیا جو سارے سرکاری شعبیاں دے منصوبیاں کوں پورا کرنڑ اچ میرٹ اتے شفافیت کوں سامنڑیں رکھیا ونجے ۔ ساریاں ترقیاتی منصوبیاں دا مقصد لوکیں دا معیار زندگی چنگا کرنڑ ہے ۔ انہاں آکھیا جو نقل و حمل دیاں چنگیاں سہولتاں اتے سڑکاں دے چال بہتر تھیونڑ نال آزاد کشمیر دے خوبصورت علاقیاں تئیں دنیا دی رسائی ممکن تھی ویسی اتے ایندے نال علاقے اچ اقتصادی سرگرمیاں اچ ودھارا تھیسی ۔ وزیراعظم آکھیا جو آزاد کشمیر دے لوکیں ولوں انتخابات اچ بھرپور اعتماد کرنڑ تے انہاں دا دل دی گہرائی توں شکریہ ادا کریندے ہئیں۔ ایں موقعے تے راجہ فاروق حیدر خان وزیراعظم پاکستان دا شکریہ ادا کریندے ہوئیں انہاں کوں یقین ڈیوایا جو آزاد کشمیر دی حکومت قیادت دے وژن تے ایندی روح دے مطابق عملدرآمد یقینی بنڑاونڑ کیتے سارے ضروری اقدامات چاتے ویسن۔
