اسلام آباد ۔ 3 اگست (اے پی پی) وفاقی وزیر تجارت انجنئیر خرم دستگیر خان آکھے جو اسلامی معاشی اتے تجارتی بلاک دا قیام ویلھے دی اہم لوڑ ہے ، اسلامی ملکاں اچ معاشی جمود کوں تروڑنڑ کیتے نویں سوچ اتے تحقیق تے توجہ ڈیونڑ دی لوڑ ہے ۔ پاکستان اسلامی ملکاں نال معاشی اتے تجارتی رابطہ کاری اچ اگوں اگوں ہے ۔ اے گالہیں وفاقی وزیر انڈونیشیاء دے شہر جکارتہ اچ تھیونڑآلی بارھویں عالمی اسلامی معاشی فورم اچ خطاب کریندے ہوئیں آکھیاں۔ وزیر اعظم پاکستان کوں ایں فورم اچ شمولیت کیتے دعوت ڈتی گئی ہئی ، وزیر اعظم پاکستان آپنڑیں جاہ تے ملک دی نمائندگی سانگے وفاقی وزیر تجارت خرم دستگیر خان کوں نامزد کیتے ۔ انڈونیشیاء دے صدر جوکوودودو فورم دا افتتاح کیتا جڈانجو ملائیشیا دے وزیر اعظم اتے فورم دے سرپرست نجیب عبدالرزاق خصوصی خطاب کیتا۔افتتاحی اجلاس نال کویت، قطر، بنگلہ دیش، الجیریا، نائیجیریا، جکستان، اردن، گنی، سری لنکا، ویتنام، تھائی لینڈ اتے اسلامی ترقیاتی بینک دے نمائندیاں خطاب کیتا۔وفاقی وزیر آپنڑیں خطاب اچ آکھیا جو اسلامی ملکاں کوں غربت مکاونڑ سانگے نجی شعبے کوں ودھاونڑاں ہوسی تانجو ترقی دے پھل غریب ترین طبقیاں تئیں پج سگن۔ پاکستان ملکاں وچال تجارت اتے معاشی تعاون کوں ودھاونڑ کیتے سانجھی اسلامی منڈی دے قیام دا حامی ہے۔انھاں آکھیا جو پاکستان اسلامی ملکاں وچال معاشی تے تجارتی تعاون کوں مضبوط کرنڑ کیتے اسلامی تعاون دی تنظیم دے ترجیحی تجارت دے معاہدیاں دی توثیق کر ڈتی ہے ۔
