اسلام آباد ۔ 25 اگست (اے پی پی) صدر مملکت ممنون حسین ‘ قدرتی آفات اتے حادثات دے موقعیاں تے انجمن ہلال احمر پاکستان دے کردار دی تعریف کریندیں ہوئیں آکھیا جو ایں کارکردگی اچ بئی چنگائی سانگے انجمن دی ساری تنظیماں کوں ہک ضابطہ کار اچ گھن آندا ونجے اتے ایں سانگے سارے ضروری تقاضے پورے کیتے ونجن ۔صدر مملکت اے گالھ خمیس کوں اتھاں انجمن ہلال احمر ولوں پیش کیتی گئی ہک بریفنگ دے موقع تے آکھی۔ایں موقع تے انجمن ہلال احمر پاکستان دی چیئر مین ڈاکٹر سعید الہی اتے بئے حکام وی موجود ہن ۔صدر مملکت ہدایت کیتی جو آفات،حادثات اتے اوندی نال ملدی جلدی صورت حال اچ بئی چنگائی سانگے متعلقہ شعبیاں اچ تربیت یافتہ افرادی قوت سانگے انجمن ہلال احمر جامع منصوبہ بندی کرے تانجو خدمات دے معیار اچ بہتری اتے پاکستان ایں بارے پڑوسی ملکاں دی مدد کرنڑ دے قابل تھی سگے۔ انجمن ہلال احمر دے چیئرمین ڈاکٹر سعید الٰہی ایں موقع تے انجمن دی سرگرمیاں اتے خدمات بارے صدر مملکت کوں بریفنگ ڈتی۔
