اسلام آباد ۔ 12 اگست (اے پی پی) وفاقی وزیرِداخلہ چوہدری نثار علی خان نال جاپان دے سفیر تاکاشی کورائی اتے آسٹریلین ہائی کمشنر مارگریٹ ایڈمسن نال انج انج ملاقاتاں کیتیاں ہن ،جیندے اچ ڈوہائیں ملکاں نال پاکستان دے ڈو طرفہ تعلقات اتے مختلف امور اچ جاری باہمی تعاون تے گالھ مہاڑ تھئی ۔ ڈوہائیں سفیراں ولوں سانحہ کوئٹہ دی بھرپور مذمت اتے قیمتی جاناں دے ضیاع تے ودھ سارے ڈکھ اتے افسوس دا اظہار کیتا گیا۔ وزارت داخلہ دے ترجمان دے مطابق جمعے کوں وفاقی وزیر داخلہ چوہدری نثار علی خان نال جاپان دے سفیر تاکاشی کورائی ملاقات کیتی ۔جاپانی سفیر آکھیا جو جاپان دہشت گردی دے خلاف جاری جنگ اچ پاکستانی عوام اتے قنون نافذ کرنڑآلے اداریاں دیاں قربانیاں کوں قدر نال ڈیکھدے اتے خطے اچ امن کیتے پاکستانی کوششاں دی تعریف کریندے ۔ ملاقات اچ پاک جاپان ڈو طرفہ تعاون کوں بیا ودھاونڑ تے اتفاق تھئے ۔ وفاقی وزیر داخلہ چوہدری نثار علی خان ایں موقعے تے آکھیا جو سیکیورٹی، قنون نافذ کرنڑآلے اداریاں دے اہلکاراں دی صلاحیت ودھاونڑ اتے ڈوہائیں ملکاں وچال خفیہ معلومات دے تبادلے دا موثر نظام رائج کرنڑ بارے بیاں کوششاں اتے اقدامات دی لوڑ ہے ۔ انہاں آکھیا جو جاپان ہمیشہ پاکستان دی بے لوث مدد اتے تعاون کیتی ہے ۔ ایں دوران وفاقی وزیر داخلہ چوہدری نثار علی خان نال آسٹریلین ہائی کمشنر ملاقات کیتی جیندے اچ ڈوہائیں ملکاں دے پاکستان دے ڈو طرفہ تعلقات اتے مختلف امور اچ جاری باہمی تعاون تے گالھ مہاڑ تھئی ۔ آسٹریلین ہائی کمشنرسانحہ کوئٹہ دی بھرپور مذمت اتے قیمتی جاناں دے ضیاع تے ودھ سارے رنج تے ڈکھ دا اظہار کیتے ۔ ملاقات دے دوران وزیر داخلہ چوہدری نثار علی خان آکھیا جو پاکستان آسٹریلیا نال آپنڑین دوستانہ تعلقات کوں بہوں اہمیت ڈیندے ۔ انہاں آکھیا جو انسداد منشیات، انسانی سمگلنگ دی روک تھام، موثر باڈر مینجمنٹ اتے سول اداریاں دی صلاحیت ودھاونڑ دے سلسلے اچ ہک ڈوجھے دے تجربیاں اتے صلاحیتاں توں فیدہ چاونڑ دی لوڑ ہے ۔
