اسلام آباد ۔ 12 اگست (اے پی پی) پاکستان بھارت کوں مسئلہ کشمیر تے باضابطہ مذاکرات دی دعوت ڈے ڈیندیں ہوئیں آکھیا جو جامع مذاکرات سانگے تیار کائنی تاں مسئلہ کشمیر تے گالھ مہاڑ کرن۔مشیر خارجہ سرتاج عزیز آکھیا جو ایں بارے سیکرٹری خارجہ جلدی آپنڑے بھارتی ہم منصب کوں خط لکھیسن،اقوام متحدہ دی جنرل اسمبلی دے آندے اجلاس اچ مسئلہ کشمیر پہلے نمبر تے ہوسی،بھارت نال جوہری دھماکے نہ کرنڑ دے معاہدے سانگے تیار ہیسے،پاکستان نیو کلیئر سپلائر گروپ دی رکنیت دی پوری صلاحیت رکھیندے،کوئٹہ دہشت گرد حملے اچ این ڈی ایس اتے ”را” بلاواسطہ ملوث تھی سگدن،آپسی تحفظات دور کرنڑ نال افغانستان نال ہر سطح تے رابطے تکھے کریسوں،افغانستان نال تعلقات سانگے نویں گائیڈ لائینز بنڑا گھدی اے،بارڈرمنیجمنٹ دے بغیر قبائلی علاقے محفوظ نی رہ سگدے،ہیلی کاپٹر دے عملے دی بازیابی دی حالی تئیں کوئی تصدیق نی تھی سگی۔اے گالھیں انہاں جمعہ کوں دفتر خارجہ اچ صحافیاں کوں بریفنگ ڈیندیں ہوئیں آکھی۔کشمیر بارے سوال دا جواب ڈیندیں ہوئیں انہاں آکھیا جو اقوام متحدہ دی جنرل اسمبلی دے آندے اجلاس اچ کشمیر پاکستان دے ایجندے اچ پہلے نمبر تے ہوسی۔پاکستان اچ تخریبی سرگرمیاں اچ بھارت دے ملوث ہوونڑ بارے ہک سوال دا جواب ڈیندیں ہوئیں مشیر خارجہ آکھیا جو پاکستان پہلے ای عالمی برادری اتے اقوام متحدہ کوں دستاویزات ڈے چکیے۔انہاں آکھیا جو یو این جنرل اسمبلی دے اگلے اجلاس توں پہلے انہاں دستاویزات کوں اپ ڈیٹ کیتا ویسی۔پکڑیے گئے بھارتی ایجنٹ کلبھوشن یادیو بارے گئی تحقیقات تھیندی پئی اے کیونجو او کلہا کائنا ہئی ،او ہک پورے نیٹ ورک نال جڑیا ہوئیا ہئی ۔
