اسلام آباد ۔ 04 ستمبر (اے پی پی) راولپنڈی توں خنجراب تئیں چار کروڑ 40 لکھ ڈالر دی لاگت نال 820 کلو میٹر لمبی پاک چین آپٹک فائبر کیبل وچھاونڑ دا منصوبہ جون 2018ء اچ پورا تھیسی ۔ پاک چین اقتصادی راہداری (سی پیک) دے تحت انفارمیشن ٹیکنالوجی دے میدان اچ اے اولین اتے اہم منصوبہ ہے جیندے پورے تھیونڑنال تجارتی راہداری ڈیجیٹل کوریڈور اچ تبدیل تھی ویسی ۔ منصوبہ چینی کمپنی ہواوے اتے سپیشل کمیونیکیشن آرگنائزیشن دے سانجھ نال شروع کیتا گئے ۔ سپیشل کمیونیکیشن آرگنائزیشن دے سینئر پراجیکٹ منیجر محمد عادل اے پی پی نال گالھ مہاڑ کریندے ہوئیں ڈسایا جو اقتصادی راہداری منصوبے دے ایں حصے نال پاکستان اتے چین وچال سٹریٹجک گانڈھے دے سلسلے اچ فیدہ پجسی ۔ انہاں آکھیا جو اے منصوبہ ریونیودے حصول دا وڈا ذریعہ وی ہوسی اتے چین اتے پاکستان وچال وائس ٹریفک دا محفوظ ترین رستہ وی ہوسی ۔ اے دنیا دے نال ذریعے کیتے ہک متباد ل ہوسی ۔ انہاں آکھیا جو ایندے نال تجارت ،سیاحت اتے آئی ٹی بارے خطے اچ آگاہی آمسی ۔ منصوبے نال گلگت بلتستان اچ معاشی موقعے میسر امسن ۔ گلگت بلتستان اتے سی پیک روٹ تے کم کرنڑ آلے سیکورٹی فورسز کوں سہولت ملسی ۔ انہاں آکھیا جو جنوبی ایشیاء ،مشرق وسطیٰ توں چین جڈانجو وسط ایشیائی ملکاں دے نال مشرق بعید اتے یورپ توں پاکستان کوں بلا واسطہ رسائی ملسی ۔ منصوبے نال خاص طور تے گلگت بلتستان دے لوکیں کوں جدید ٹیلی مواصلات دیاں سہولتاں ڈیونڑ اچ مدد ملسی ، اتے مقامی سطح تے روزگار دے موقعے وی ملسن۔ ایں منصوبے دا 18.2 کلو میٹر حصہ وفاقی دارالحکومت، 466 کلو میٹر گلگت بلتستان، 280 کلو میٹر خیبرپختونخوا اتے 47 کلو میٹر حصہ پنجاب اچ ہوسی ۔ آپٹکل فائبر کیبل کوں گوادر تئیں ودھاونڑ دا منصوبہ وی اخیری مرحلے اچ ہے جیندے نال سی پیک دے رستیاں دے نال شروع توں اخیر تئیں باہمی بین الاقوامی رابطہ بنڑاونڑ اں ہوسی ۔
