اسلام آباد ۔ 29 ستمبر (اے پی پی) پاکستان آکھیا جو لائن آف کنٹرول تے سرجیکل سٹرائک دا بھارتی دعویٰ بے بنیا د اے،بھارت لائن آف کنٹرول تے سیز فائر کیتی بلااشتعال خلاف ورزی کیتی،کوئی ملک سندھ طاس معاہدے توں یکطرفہ طور خود کوں انج نی کر سگدا،بھارت کوں مقبوضہ کشمیر اچ مظالم اتے انسانی حقوق دی خلاف ورزیاں توں عالمی توجہ ہٹاونڑ اچ ناکامی تھی اے،سارے تصفیہ طلب مسئلے مذاکرات نال حل کرنڑ چاہندے ہیسے،بھارتی روئیے پاروں ماضی اچ وی کئی واری سارک کانفرنس ملتوی کرنڑاں پئی ،پاکستان کشمیریاں تے مظالم دے خلاف آواز چیندا رہسی۔اے گالھیں دفتر خارجہ دے ترجمان محمد نفیس ذکریا خمیس کوں ہفتہ وار بریفنگ وچال صحافیاں دے مختلف سوالاں دے جواب ڈیندیں ہوئیں آکھی۔ترجمان اڑی حملہ بارے ہک سوال دا جواب ڈیندیں ہوئیں آکھیا جو بھارت کوں کشمیر اچ مظالم توں عالمی توجہ ہٹاونڑ اچ مایوسی تھی اے۔اوڑی حملہ بھارتی دہشت گرد تنظیماں دی کاروائی تھی سگدی اے۔سمجھوتہ ایکسپریس حملے اچ وی بھارتی تنظیماں آپنڑے جرم دا اعتراف کیتے۔بھارت پاکستان اچ تخریبی کاروائیاں اتے دہشت گرداں دی مالی معاونت اچ ملوث رہیے اتے بلوچستان اچ لَت اڑیندا پئے ۔بلوچستان اچ بھارتی را ایجنٹ کلبھوشن یادیو دی گرفتاری اتے اوندے اعترافی بیان دنیا ڈٹھن ۔ترجمان آکھیا جو اساں ڈے بلوچستان اچ بھارتی مداخلت دے ثبوت ہن پئے ۔اجوکے ڈینھاں اچ ای براہمداغ بگٹی ولوں بھارتی شہریت سانگے درخواست اتے نریندر مودی دے ایں بارے بیانات ایں گالھ دا نشابر ثبوت ہن ۔پاکستان کوں کلھا کرنڑ بارے ہک سوال دا جواب ڈیندیں ہوئیں انہاں آکھیا جو بھارتی وزیر اعظم دے بیانات نال پاکستان کوں کلھا نی کیتا ونج سگدا۔پاکستان دے روس،وسطی ایشیا ملکاں ،اسلامی ملکاں اتے یورپ نال تعلقات اچ ودھارا تھیے جڈانجو پاک روس سانجھی فوجی مشقاں ایں ویلھے پاکستان اچ جاری ہن ۔پاکستان شنگھائی تعاون تنظیم اتے ایکو سمیت کئی علاقائی تنظیماں دا فعال رکن اے۔ترجمان ہک سوال دا جواب ڈیندیں ہوئیں آکھیا جو پاکستان مذاکرات تے یقین رکھیندے ،پاکستان یکا سارے معاملے مذاکرات نال حل کرنڑ تے زور ڈتے۔ترجمان آکھیا جو افغانستا ن بارے بین الاقوامی کانفرنس چار اکتوبر کوں برسلز اچ تھیندی پئی اے۔
