اسلام آباد ۔ 9 ستمبر (اے پی پی) وزیراعظم محمد نواز شریف آکھے جو ملک دی دیرپا خوشحالی کیتے پائیدار ترقیاتی اہداف (ایس ڈی جیز)دا حصول بہوں لازمی ہے جڈانجو وفاقی کابینہ دیامر بھاشا ڈیم کیتے زمین گھنڑ کیتے معاوضہ نرخاں اتے افغان مہاجرین بارے پروف رجسٹریشن کارڈز اتے سہ فریقی معاہدے اچ 31 مارچ 2017ء تئیں توسیع دی منظوری ڈے ڈتی ہے ۔ وفاقی کابینہ دا اجلاس جمعے کوں وزیراعظم محمد نواز شریف دی صدارت اچ وزیراعظم ہائوس اچ تھیا۔ وزیراعظم محمد نواز شریف وزیراعظم دے عالمی حصول ایس ڈی جیز پروگرام بارے اجلاس اچ گالھ مہاڑکریندے ہوئیں آکھیا جو پاکستان دنیا دا پہلا ملک ہے جئیں قومی ترقیاتی ایجنڈے دے حصے دے طور تے پارلیمنٹ اچوں ایس ڈی جیز دی منظوری گھدی ہے ۔ انہاں آکھیا جو ایں پروگرام دے تحت گھٹ ترقی یافتہ علاقیاں تے خصوصی توجہ ڈیندے ہوئیں بنیادی طور تے صحت تے تعلیم دے شعبیاں اچ ملک دے سارے علاقیاں اتے لوکیںکوں ہکو سنویں موقعے ڈتے ویسن۔ انہاں آکھیا جو ایس ڈی جیز تے موثر عمل درآمد کیتے مقامی آبادیاں کوں مکمل طور تے شریک عمل کیتا ونجنڑاں چاہیدے ۔ وفاقی کابینہ دیامر بھاشا ڈیم کیتے زمین گھنڑ دی مد اچ معاوضہ نرخاں دی منظوری ڈے ڈتی ۔ وزیراعظم محمد نوازشریف متاثرین کوں معاوضے دی تقسیم اچ شفافیت کوں یقینی بنڑاونڑ دی ہدایت کیتی۔ انہاں آکھیا جو پن بجلی دے وڈے وڈے منصوبیاں دی تعمیر نال ملک دی توانائی دی لوڑ پوری کرنڑ اتے سیلاباں کوں روکنڑ اچ بہوں ودھ مدد ملسی ۔ انہاں آکھیا جو موجودہ حکومت پاکستان کوں درپیش توانائی دے مسلیاں کوںحل کرنڑ اچ پوری توجہ ڈتی ہوئی ہے ۔ اساڈے منصوبے ایں مَد اچ گھٹ ، درمیانے اتے لمبی مدت دے منصوبے شامل ہن ۔ وزیراعظم آکھیا جو دیامر بھاشا ڈیم دے متاثرہ لوکیں کوں معاوضے دی رقم دی ونڈ اچ شفافیت کوں برقرار رکھا ونجنڑاں چاہیدے ۔
