اسلام آباد ۔ 29 ستمبر (اے پی پی) وفاقی وزیر منصوبہ بندی تے ترقی و اصلاحات پروفیسر احسن اقبال آکھیا جو 2030ء دا پاکستان اجوکی نسل دا اے،نینگراں ملک کوں ترقی دی راہ تے ٹورنڑاں اے،سیاسی استحکام اتے پالیسیاں اچ تسلسل دے بغیر کوئی ملک ترقی نی کر سگدا،سی پیک منصوبے پاروں پاکستان دنیا دی توجہ دا مرکز بنڑ گئے ۔وفاقی وزیر آکھیا جو 2013ء دے پاکستان توں 2016ء دا پاکستان چنگا اے،حکومت دی سرمایہ کار پالیسیاں پاروں بین الاقوامی سرمایہ کار پاکستان اچ سرمایہ کاری سانگے امدے پئن ۔انہاں آکھیا جو مضبوط معیشت سانگے ملک اچ امن تے استحکام ضروری اے۔بہترین وسائل نال اساں پاکستان کوں انہاں سارے مسئلیاں اچوں کڈھنڑ اچوں کامیاب تھی ویسوں۔انہاں آکھیا جو پاکستان دنیا اچ تکھے ابھردی ہوئی معیشت دے طور سامنڑے امدا پئے ،ملک دی بقاء سانگے جمہوریت لازمی اے۔انہاں آکھیا جو توانائی دے شعبے تے 35ارب ڈالر خرچ تھیندے پئن ۔اے گالھیں انہاں نیشنل یوتھ پیس فیسٹیول دے افتتاحی سیشن نال خطاب کریندیں ہوئیں آکھی۔
