واشنگٹن۔ 19 اکتوبر (اے پی پی) امریکی صدر براک اوباما ریپبلکن پارٹی دے صدارتی امیدوار ڈونلڈ ٹرمپ ولوں آئندہ انتخابات وچ دھاندلی دی منصوبہ بندی دے حوالے نال لاتے گئے الزاماں کوں مسترد کریندے ہوئیں آکھیا ہے جوٹرمپ بہانے بنڑاونڑ بند کرین۔برطانوی نشریاتی ادارے دے مطابق ہلری کلنٹن دی حمایت سانگے کیتی گئی ہک ریلی وچ شرکت کریندے ہوئیں صدر اوباما آکھیا جو کہیں صدارتی امیدوار دا انتخابات توں پہلے ای امریکی الیکشن کوں متنازع بناونڑ دی کوشش انوکھی ہے۔انھاں آکھیا جو کہیںصدارتی امیدوار ولوںروسی صدر دیاں تعریفاں وی غیر معمولی ہن۔ڈونلڈ ٹرمپ بارے وچ صدر اوباما آکھیا جوا یہ صدر دے عہدے سانگے درکار قیادت اتے ہمت دی عکاسی نی کریندا جو تساں مقابلے توں پہلے ای بہانے بناونڑ شروع کر ڈتن۔انہاں آکھیا جو اگر تساں ہرنڑلگو اتے تساں کہیں ہور تے ذمے داری پاونڑ شروع کر ڈیو،تاں ایندا مطلب ہے جو تساڈے اندر اوہ خصوصیات کائنی جیرھیاں جو ایں کم وچ درکار ہن۔صدر اوباما دا آکھنڑ ہا جو ایں گالھ کوئی منطق کائنی جو تساں ڈونلڈ ٹرمپ دے تریمتاں دے معاملے وچ نازیبہ بیان دی مخالفت کرو لیکن ول وی انہاں دی صدارت دی حمایت کرین۔واضح رہوے جو ڈونلڈ ٹرمپ دعویٰ کیتا ہے جو آئندہ مہینے تھیونڑ آلے امریکی صدارتی انتخابات وچ ہلری کلنٹن دے حق وچ دھاندلی دی منصوبہ بندی کر گھدی گئی ہے۔
