اسلام آباد۔31 اکتوبر (اے پی پی) وفاقی وزیر منصوبہ بندی تے ترقی احسن اقبال آکھیا ہے جو وزیراعظم محمد نواز شریف دی قیادت وچ اساں سارے ہک مٹھ ہوں اتے ملک دی ترقی تے خوشحالی سانگے کم کر یندے پئے ہسے جیندی وجہ نال ملک ترقی دے رستے تے ٹردا پئے لیکن کجھ لوک سازش دے تحت ملکی حالات کو ںبحران آلے پاسے گھن ونجڑ دی کوشش کر یندے پن۔ اتوار کوں ہک نجی ٹی وی چینل دے پروگرام وچ گالھ مہاڑ کریندے ہوئیں انہاں آکھیا جو ایں ویلھے اساکوں آپس دے اتفاق تے اتحاد دی ودھ ساری ضرورت ہے اتے اساکوں ملک وچ یکجہتی دی فضا کو ں ودھاونڑ چاہیدے، پاک چین اقتصادی راہداری منصوبہ ملکی ترقی تے خوشحالی آلے پاسے ہک چنگا ںقدم ہے جیرھانہ صرف پاکستان بلکہ پورے خطے سانگے فائدہ ہے ایں سانگے اساں ساریاں کوں ایں منصوبے دی وختی تکمیل سانگے اپنڑاں کردار ادا کرنڑاں چاہیدے ۔ انہاں آکھیا جوموجودہ حکومت توانائی بحران سمیت ملک وچوں دہشتگردی تے انتہا پسندی کوں منڈھوںمکاونڑ سانگے سنجیدہ اتے مخلصانہ کوششاںکر یندی پئی ہے جیندے ودھ سارے نتیجے وی ملدے پن، اج دا پاکستان 2013ءجڈاں اساں حکومت سانبھی ہائی اوندی نسبت وچ پرامن اتے خوشحال ہے جیندے وچ ہر آندے ڈینھ دے نال نال چنگائی آندی پئی ہے۔ وفاقی وزیر دا آکھنڑ ہا جو اوہ ڈینھ دور کائنی جڈاں ملک وچوں انددھارے کوں مکا ڈتا ویسی ۔ ہک سوال دے جواب وچ انہاں آکھیا جو پرامن احتجاج ہر شہری دا حق ہے جیندے نال اساں کڈاہیں وی کہیں کوں وی نی روکیا پر ایہ لوک تاں دارالحکومت اسلام آباد کوں بند کرنڑ دیاں گالھیں کریندے پن، حکومت دی ذمے داری ہے جو او کہیں وی جتھے یا گروپ کوں اسلام آباد بند کرنڑ توں روکے جینکوں پورا کیتا ویسی اتے کہیں وی گروپاں کوں اسلام آباد بند کائناں کرنڑ ڈیسوں، عام آدمی دے جان و مال دا تحفظ وی حکومت دی ذمے واری ہے جینکوں پورا کریسوں۔ ہک بئے سوال دے جواب وچ احسن اقبال آکھیا جو پاکستانی عوام پاکستان مسلم لیگ ن کو ں پنج سال دا مینڈیٹ ڈتاہے جیرھا اساں پورا کریسوں اتے وزیراعظم محمد نواز شریف ہک منتخب وزیراعظم ہن ا وہ استعفیٰ کیوں ڈیون، اساڈے مخالفاں دا تاں کم ای وزیراعظم توںاستعفیٰ منگنڑ ہے اتے ا وہ قیامت تئیں استعفیٰ ہی منگدے راہسن، پاکستان تحریک انصاف منفی تے احتجاجی سیاست کر یندی پئی ہے جیندے نال نہ تا ں اینکوںماضی وچ کجھ ملیا اتے نہ ہی ہنڑ ملسی کیونجو پاکستانی عوام انہاں دی منفی سیاست کو ںمسترد کر ڈتا ہے جیندا ثبوت او ہر ضمنی انتخاب وچ کر یندے پن اتے اپنڑے ووٹ دی طاقت نال وزیراعظم محمد نواز شریف دی ترقی تے خوشحالی دیاں پالیسیاں تے اپنڑے ودھ سارے اعتماد دا اظہار کر یندے پن ۔
