اسلام آباد ۔ 17 اکتوبر (اے پی پی) کپاہ دی ملکی پیداوار 20 ملین گٹھاں تئیں ودھا تے سالانہ 60 ارب روپے دے زرمبادلہ دی بچت کیتی ونج سگدی ہے ۔ حکومت کپاہ دی مقامی پیداوار دے فروغ کیتے کپاہ دے کاشتکاراں کیتے جامع پالیسی ڈیوے ۔ پاکستان کاٹن جنرز ایسیوسی ایشن (پی سی جی اے ) دے چئیرمین ڈاکٹر جیسومل آکھیا جو کپاہ دے کاشتکاراں دی حوصلہ افزائی کوں سامنڑیں رکھ تے حکومت مقامی پیداوار دی مناسب نرخاں تے خرید کوں یقینی بنڑاوے ،جیندے نال کپاہ دی ملکی پیداوار دے فروغ اچ مدد ملسی ۔ انہاں آکھیا جو کپاہ دی ملکی پیداوار دے اضافے کیتے جامع پالیسی ڈتی ونجے ،تانجو ملکی پیداوار کوں 20 ملین گٹھاں تئیں ودھایا ونج سگے ، اتے روئی دی ملکی لوڑ کوں پورا کیتا ونج سگے ۔ انہاں آکھیا جو ملکی پیداوار اچ ودھارے نال روئی دی درآمد گھٹ تھیونڑ نال تقریبا 60 ارب روپے سالانہ قیمتی زرمبادلہ بچایا ونج سگسی ۔
