اسلام آباد ۔ یکم نومبر (اے پی پی) وفاقی وزیر برائے پارلیمانی امور شیخ آفتاب آکھیا ہے جو پاکستان تحریک انصاف دے کارکناں کوں محب وطن پاکستانی بنڑن دی ضرورت ہے۔ذرائع ابلاغ نال گالھ مہاڑ کریندے ہوئیں انھاں آکھیا جو پاکستان مسلم لیگ (ن) دی حکومت ملکی ترقی تے خوشحالی سانگے معاشی منصوبہ بندی کر یندی پئی ہے ڈوجھے پاسے عمران خان ترقی دی راہ وچ روڑے اڑیندا پئے ۔ انھاں آکھیا جو عمران خان کوں سوچنڑ چاہیدے جو اساکوں سرحداں تے بھارتی جارحیت اتے ملک دے اندر دہشتگردی دا سامنڑاں ہے اتے پاکستان دی فوج جوانمردی دے نال ڈوہائیں نال نبڑدی پئی ہے اتے ایہ حالات کوں کہیں پاسے گھن تے ویندے پن۔ شیخ آفتاب آکھیا جو پی ٹی آئی دے کارکناں کوں محب وطن پاکستانی بننڑن دی ضرورت ہے ۔ انھاں آکھیا جو احتجاج دی وجہ نال بال سکول نی ونج سگدے پئے، ملازم دفتراں وچ نی پج سگدے پئے ، مریض، مسافر اتے کاروباری بندے وی مشکلاں دا شکار ہن ۔ انھاں آکھیا جو عمران خان دی سیاست ملک کوں تعمیر نہیں بلکہ تباہی آلے پاسے گھن تے ویندی پئی ہے۔
