پاکستان دا مقبوضہ کشمیر دے عوام دی جائز جدوجہد آزادی سانگے اپنڑی اخلاقی سیاسی اتے سفارتی حمایت جاری رکھنڑ دا عزم دا اعادہ
بین الاقوامی برادری بھارت ولوں دانستہ طور تے شہریاں کوں نشانہ بنڑاونڑ اتے ودھدیاں ہویاں ہلاکتاں دا نوٹس گھنے اتے لائن آف کنڑول تے وگرڈی ہوئی صورت حال دے خاتمے اچ اپنڑاں چنگاں کردار ادا کرے
پاکستان سیز فائر دیاں ودھ ساریاں خلاف ورزیاں دے باجود صبر کیتا ،اساں بے گناہ شہریاں اتے بالاں تے تریمتاں ایمبولینس تے سویلین ٹرانسپورٹ کوں دانستہ طور تے نشانہ بنڑائے ونجنڑ کوں ہر گز برداشت کائنی کر سگدے ،اساں اپنڑے کشمیری بھراواں دی آزادی دی جدوجہد توں کڈاہیں وی دستبر دار کائناں تھیسوں ،وزیراعظم نواز شریف
اسلام آباد ۔ 24 نومبر (اے پی پی) پاکستان مقبوضہ کشمیر دے عوام دی جائز جدوجہد آزادی سانگے اپنڑی اخلاقی، سیاسی اتے سفارتی حمایت جاری رکھنڑ دے عزم دا اعادہ کریندے ہوئیں بین الاقومی برادری تے زور ڈتا ہے و او بھارت ولوںدانستہ طور تے شہریاں کوں نشانہ بنڑاونڑ اتے ودھدیاںہویاں ہلاکتاں دا نوٹس گھنے اتے لائن آف کنڑول تے وگڑدی ہوئی صورت حال دے خاتمے سانگے اپنڑاں کردار ادا کرے ۔ایں گالھ دا اظہار خمیس کوں اتھاں وزیراعظم نواز شریف دی زیر صدارت اجلاس اچ کیتاگیا جیں اچ بھارتی سیکورٹی فورسز ولوںوادی نیلم دے نیڑے مسافر بس دے خون ریزی حملے دے بعد پیدا تھیونڑ آلی صورت حال دا جائزہ گھدا گیا ۔اجلاس اچ بھارتی سیکورٹی فورسز ولوں مسلسل بلا اشتعال فائرنگ دے تناظر اچ لائن آف کنڑول دے نال صورت حال تے غور کیتا گیا ۔وزیراعظم دے مشیر خارجہ امور سرتاج عزیز، ڈی جی آئی ایس آئی لیفٹیننٹ جنرل رضوان اختر، وزیراعظم دے معاون خصوصی طارق فاطمی اتے قومی سلامتی دے مشیر لیفٹیننٹ جنرل (ر) ناصر خان جنجوعہ بالخصوص 23 نومبر 2016ءکوں دھنیال سیکٹر اچ بھارتی قابض فوج ولوں سیز فائر دی بلااشتعال خلاف ورزیاں دے بعد لائن آف کنٹرول دے نال موجودہ صورت حال تے وزیراعظم کوں بریفنگ ڈتی ۔ ایں واقعے اچ بھارتی فوج ولوں دانستہ طور تے ہک سویلین بس تے بعد اچ زخمیاں کوں گھن ونجنڑ آلی ایمبولینس کوں نشانہ بنڑایاگیا ۔اجلاس اچ بس حملے دی ودھ ساری مذمت کریندے ہوئیں بھارتی مقبوضہ جموں تے کشمیر دے عوام دی اقوام متحدہ دی سلامتی کونسل دیاں قرار داداں دے مطابق حق خود ارادیت دے حصول سانگے انہاں دی جائز جدوجہد سانگے سیاسی ،اخلاقی اتے سفارتی حمایت دا اعادہ کیتا گیا ۔اجلاس اچ بین الاقوامی برادری تے زور ڈتا گیا جو او شہریاں کوں جانڑ بجھ تے ہدف بنڑاونڑ دے ودھدے ہوئے سویلین جانی ضیان دا نوٹس گھنے اتے بھارت ولوں دانستہ طور تے کشیدگی اچ ودھارے پاروں لائن آف کنڑول تے سلامتی دی وگرڈی ہوئی صورت حال پرے کرنڑ اچ اہم کردار ادا کرے اجلاس اچ پاکستان دی مسلح فوج دے نینگراں کوں زبر دست خراج عقیدت پیش کیتا جنہاں گزریل ڈینھ مادر وطن دا دفاع کریندے ہوئیں اپنڑیاں جاناں دا نذرانہ پیش کیتا ۔ اجلاس اچ وزیراعظم دے مشیر خارجہ امور سرتاج عزیز، وزیراعظم دے معاون خصوصی طارق فاطمی، قومی سلامتی دے مشیر لیفٹیننٹ جنرل (ر) ناصر خان جنجوعہ، ڈی جی آئی ایس آئی لیفٹیننٹ جنرل رضوان اختر، خارجہ سیکریٹری اعزاز احمد چوہدری اتے بئے سینئر حکام شرکت کیتی ۔
