اسلام آباد ۔ 19 نومبر (اے پی پی) وزیر برائے انسانی حقوق سینیٹر کامران مائیکل آکھے جو پاکستان بالیں دے تحفظ،ترقی اتے انہاں دی بقاءکوں یقینی بنڑاونڑ کوں پہلی ترجیح ڈیونڑ دے آپنڑیں عزم اُتے قائم ہے ۔ چھنڑ چھنڑ کوں بالیں دے عالمی ڈینھ دے موقعے تے آپنڑیں سنیہے اچ انہاں آکھیا جو پاکستان اے دینھ بہوں جوش اتے جذبے نال مناونڑ اچ بئے ملکاں دے نال شریک ہے۔اے ڈینھ اساکوں بالیں دے حقوق دے حوالے نال آپنڑیاں زمہ داریاں دی یادڈیوندے ۔ کامران مائیکل آکھیا جو علاقائی سطح تے پاکستان جنوبی ایشیا اچ بالیں دی فلاح کوں فروغ ڈیونڑ کیتے ریجنل انتظامات اتے بالیں تے تریمتیں دی سمگلنگ دی روک تھام بارے سارک معاہدیاں اُتے دستخط کیتے ہن ۔ انہاں آکھیا جو بہوں اوکھ دے باوجود پاکستان بالیں دے تحفظ اتے حقوق بارے بہوں ساریاں پالیسیاں بنڑایاں ہن اتے قنون سازی کتیی ہے ۔ ایں توں علاوہ وزارت انسانی حقوق بارے ہک قومی پلان آف ایکشن اُتے عملدرآمد کریندی پئی ہے جیندے نال بالیں دے تحفظ،چائلڈ لیبر،تعلیم اتے بالیں اُتے تشدد اتے امتیازی سلوک کوں مکاونڑ بارے تفصیلی باب وی شامل ہے۔
