اسلام آباد ۔ 14 نومبر (اے پی پی) صدر مملکت ممنون حسین بھارتی فوج دی بلااشتعال فائرنگ دے نتیجے اچ فوجی جواناں دی شہادت اُتے ودھ سارا ڈکھ اتے افسوس ظاہر کیتے اتے آکھے جو پاکستان خطے اچ امن چاہندے اتے او کہیں وی ملک نال بھڑاند نہیں چاہندا، جڈانجو جیکر جارحیت تھئی تاں ایندا منہ بھن جواب ڈتا ویسی ، اساڈی مسلح افواج پوری طرح چوکس ہن اتے او ایں طرح دی جارحیت دا منہ بھن جواب ڈیونڑ دی بھرپور صلاحیت رکھیندی ہن ۔ سنوار کوں ایوان صدر ولوں جاری بیان اچ انہاں شہید تھیونڑآلے فوجی جواناں کوں خراج عقیدت پیش کریندے ہوئیں آکھیا جو انہاں دیاں قربانیاں رائیگاں کائناں ویسن۔ صدر مملکت آکھے جو بھارتی افواج مسلسل سرحداں دی خلاف ورزی کریندے پئے ہن ۔ صدر مملکت آکھیا جو بھارت ولوں لائن آف کنٹرول اُتے بلااشتعال فائرنگ دا مقصد مقبوضہ کشمیر توں توجہ ہٹاونڑ دی ناکام کوشش ہے جتھاں روزانہ بے گناہ کشمیریاں کوں شہید کیتا ویندا پئے ، جنہاں اچ بال ، جوان، بڈھے اتے تریمتیں شامل ہن ۔ صدر مملکت آکھیا جو مقبوضہ کشمیر اچ جاری تشدد دی مثال پوری دنیا اچ نہیں ملدی۔ صدر مملکت آکھیا جو پاکستان سفارتی محاذ اُتے کشمیر دے مسئلے کوں بھرپور طریقے نال چاتے ، جیندے نال بھارت دی سبکی تھئی ہے تاتے اوندا مقبوضہ کشمیر اچ اصل چہرہ سامنڑیں آیا ہے ۔ انہاں آکھیا جو بھارت ہنڑ اوچھے ہتھکنڈیاں دے ذریعے بین الاقوامی برادری دی توجہ ہٹاونڑاں چاہندے ، جیندے اچ او کامیاب کائناں تھی سگسی ۔
