اسلام آباد ۔ 9 دسمبر (اے پی پی) امریکی سینیٹ دی مسلح افواج کمیٹی دے چیئرمین سینیٹرجان میکین آکھے جو امریکا دہشت گردی دے خلاف پاکستان دیاں کوششاں اچ تعاون جاری رکھیسی ۔ اے گالھ انہاں وزیر اعظم دے معاون خصوصی برائے خارجہ امور طارق فاطمی نال گالھ مہاڑ کریندے ہوئیں آکھی۔ دفتر خارجہ دے ترجمان دے مطابق طارق فاطمی گزریل ڈینھ واشنگٹن اچ سینیٹر جان میکین نال ملاقات کیتی اتے ڈوطرفہ تعلقات تے علاقائی سلامتی دے امور اُتے گالھ مہاڑ کیتی۔ ملاقات دے دوران کنٹرول لائن اُتے کشیدہ صورتحال اتے پاک افغان تعلقات اُتے وی غور کیتا گیا۔ معاو ن خصوصی جان میکین کوں پاک فوج دی شمالی وزیرستان اچ دہشت گرداں دے خلاف کامیاب فوجی آپریشن بارے وی ڈسایا۔ سینیٹرجان میکین پاکستان دی دہشت گردی کوں مکاونڑ کیتے کوششاں دی تعریف کیتی ۔ انہاں آکھیا جو امریکا دہشت گردی دے خلاف پاکستان دیاں کوششاں اچ تعاون جاری رکھیسی ۔ ترجمان دے مطابق ملاقات اچ پاک افغان تعلقات اتے ایل او سی تے ورکنگ باونڈری اُتے ودھدی ہوئی کشیدگی سمیت علاقائی صورتحال بارے وی گالھ مہاڑ کیتی گئی ۔ سینیٹر جان میکین فوجی کمانڈ اچ کامیاب رد وبدل اُتے پاکستان کوں مبارخ ڈتی اتے ایں عزم دا اعادہ کیتا جو امریکا خطے اچ پائیدار امن تے استحکام سانگے پاکستان دے نال تعاون جاری رکھیسی ۔ معاون خصوصی جان میکین کوں آندے سال پاکستان دے دورے وی دعوت وی ڈتی ۔ ایں دوران طارق فاطمی واشنگٹن اچ امریکی سینیٹ دی مسلح افواج کمیٹی دے رینکنگ رکن ایلیٹ اینجل نال وی ملاقات کیتی۔
