اسلام آباد ۔ 14 دسمبر (اے پی پی) صدر مملکت ممنون حسین کوںپاکستان اچ تعینات تھیونڑ آلے ست ملکاں دے سفیراں اپنڑیاں سفارتی سنداں پیش کر ڈتیاں۔ایوان صدر اچ بدھ کوںہک پر وقار تقریب اچ سنداںسفارت پیش کرنڑ آلیں اچ یمن، کویت، رومانیہ، مالی، کولمبیا، موریطانیہ تے البانیہ دے سفیر شامل ہن۔ایںتوں پہلے ہر ملک دے نامزد سفیر کو ںبگھی تے انجھ انجھ ایوان صدر دے مرکزی دروازے تے لاتا گیا جتھاںانہاںکوںگارڈ آف آنر پیش کیتاگیا۔ ایں موقع تے متعلقہ ملک اتے پاکستان دا قومی ترانہ وی وجایا گیا ۔ایندے بعد نویں تعینات سفیراں صدر مملکت نال انجھ انجھ ملاقاتاںکیتیاں۔ ایں موقع تے صدر مملکت ممنون حسین آکھیا جو پاکستان سارے ملکاں دے نال دوستانہ تعلقات چاہندا ہے ،خاص طور تے خطے اچ امن تے ترقی سانگے ہمسایہ ملکاں دے نال دوستانہ تعلقات بہوں اہم ہن۔انہاںآکھیا جو خطے اچ امن تے استحکام سانگے ہر ملک کوںاپنڑاں کردار ادا کرنڑاں ہوسی ۔انہاںآکھیا جو پاکستا ن اچ سرمایہ کاری دے ودھ سارے موقع موجود ہن جیں نال سرمایہ کاراںکوں ودھ سارا فائدہ تھیسی ۔صدر مملکت آکھیا جو ضرب عضب اپریشن کامیابی نال جاری ہے تے چھیکڑی دہشت گرد دے خاتمے تئیں جاری رہسی ۔صدر مملکت پاکستان اچ تعینات تھیونڑ آلے سفیراں کوں مبارخ ڈتی تے ایں امیددا اظہار کیتاجو او اپنڑے ملکاںدے نال پاکستان دے نال تعلقات کوں ودھارا ڈیسن ۔سنداں پیش کرنڑ آلے سفیراں اچ یمن دے سفیر محمد موتہر السابی، کویت دے نصر عبدالرحمٰن جاثر ال مہوتہری، رومانیہ دے نکولاگویا، مالی دے ا بوبکر گورو دیال، کولمبیا دے جوہان الفریڈو پینٹو سویڈرا، موریطانیہ دے سیدی محمد لگطاف اتے البانیہ دے جینٹی گیزیلی شامل ہن۔
