اسلام آباد ۔ 6جنوری (اے پی پی) وفاقی وزیر منصوبہ بندی، ترقی تے اصلاحات پروفیسر احسن اقبال آکھیا ہے جو بین المذاہب ہم آہنگی وقت دی ضرورت ہے تے سارے مذہب دے سکالرز کوں مکالمے دے عمل اچ شریک کرنڑاں چاہیدا ہے مذہب اچ مشترکہ اصولاں کوں سامنڑے رکھ تے انتشار تے تفریق دا خاتمہ ممکن ہے ، سیرت النبیﷺ اتے قرآن دی تعلیمات تے عمل نہ کرنڑ نال مسلم دنیا انخطاط دا شکار تھی،تقسیم در تقسیم تے فرقہ پرستی اچ پئے تے اساں تباہی دے پاسے چلیے گے۔انہاں خیالاں دا اظہار انہاں جمعے کوںاتھاںپشاور یونیورسٹی دی سیرت چیئر دے اہتمام نال مقامی ہوٹل اچ بین المذاہب ہم آہنگی کانفرنس توں خطاب دے دوران کیتا۔وفاقی وزیر آکھیا جونائن الیون دے کجھ عناصر اسلام دا ناں استعمال کریندے ہوئیں اسلام تے مسلماناں کوں بدنام کیتا جیں دی وجہ توں مسلمان ملکاں اچ شناخت دا مسئلہ تھیا ۔ انہاںآکھیا جو ترقی تے معاشی تبدیلی سانگے قوم دی اخلاقی تربیت دی ضرورت ہے ۔ ،پیغمبر اسلام ﷺ ریاست مدینہ قائم کرتے سارے شہریاں دی جان تے مال دے تحفظ دی یقین دہانی کراءاتے میثاق مدینہ دی صورت اچ مختلف مذہب دے احترام دا سبق ڈتا ۔انہاںآکھیا جو نبی کریمﷺ ولوں پیش کردہ علمی ماڈل کو ںبھلاونڑ نال مسلم معاشرہ جھکے پاسے چلا گیا ، نبی کریم ﷺولوں دنیا کوں مسخر کرنڑ دی سبق ڈیونڑ دے باوجود اساں سائنس دے میدان توں پرے ہیسے،اساڈے ایمان دی تکمیل اچ تعلیم دا حصول بنیادی جزو ہے،نبی کریمﷺ سماجی انصاف دے اصولاں دے تحت معاشرہ قائم کیتا جیرھا جواسلام دے تکھی رفتار کھنڈاونڑ دا باعث بنڑیا ۔ انہاںآکھیا جو سماجی انصاف دے نال نال پیغمبر اسلام انسانی حقوق دا چارٹر ڈتا،سیرت النبی نال اساکوں کامیاب قیادت دا ماڈل ملدا ہے مگر مسلماناں ایں ماڈل دی پیروی کائنی کیتی ۔وفاقی وزیر آکھیا جو سیرت النبی ﷺ نال اساکوں پائیدار ترقی تے ماحول دے تحفظ دا سبق ملد اہے ،اسلام معیشت دی ترقی سانگے رہنما اصول ڈتے جیں تے اج وی عمل در آمد نال کامیابی ممکن ہے ۔انہاں آکھیا جو سیرت النبی ﷺ تے عمل در آمد نہ کرنڑ نال اج اساکوں جائیداد تے بئے معاشی مسلیں اچ لڑائی دا سامنڑاں ہے ۔پیغمبر اسلام تریمتاں دے حقوق سانگے جیرھے اصول بنڑائے مغربی معاشرہ اج وی ایں دا تصور نی کر سگدا۔وفاقی وزیرآکھیا جو سیرت چیئرز کوں روایتی اداریں دی بجائے نبی پاک ﷺدی تعلیمات کوں عام کرتے جدیدمسلیں دا حل ممکن بنڑاونڑ سانگے استعمال کرنڑ دی ضرورت ہے ۔ایں موقع تے ہائر ایجوکیشن کمیشن دے چیئرمین ڈاکٹر مختار احمد اتے چیئر مین سیرت چیئر ہائر ایجوکیشن کمیشن ڈاکٹر پروفیسر قبلہ ایاز وی خطاب کیتا۔
