اسلام آباد ۔ 28 فروری (اے پی پی) صدر مملکت ممنون حسین اتے آذربائیجان دے صدر الہام علیوف ڈوہائیں ملکاں وچال تجارت، تعلیم، سائنس و ٹیکنالوجی اتے دفاع دے شعبیاں اچ تعاون ودھاونڑ اُتے اتفاق کیتے۔ ملاقات اچ ڈوہائیں اگوانڑاں پاکستان دا ”نگوونو کاراباخ“ اتے آذربائیجان دا ”کشمیر“ دے مسئلے اُتے حمایت جاری رکھنڑ دا اعلان کیتا۔ آذربائیجان دے صدر الہام علیوف آپنڑیں وفد دے نال اقتصادی تعاون دی تنظیم اچ شرکت کیتے پاکستان پجے ہن ، جنہاں ایوان صدر اچ صدر ممنون حسین نال ملاقات کیتی۔ ملاقات اچ ڈوہائیں اگوانڑاں وچال علیحدگی اچ تھیونڑآلی ملاقات دے بعد وفود دی سطح تے مذاکرات تھئے ۔ آذربائیجان دے صدر الہام علیوف آکھے جو دنیا اُتے اے واضح کرنڑ دی لوڑ ہے جو اسلام امن دا دین ہے۔ صدر علیوف آکھے جو پاکستان اتے آذربائیجان ٹیکسٹائل، زرعی آلات اتے ادبیات دے شعبیاں اچ سانجھے منصوبیاں اُتے کم کر سگدے ہن ۔ آذربائیجان دے صدر آکھیا جو ایں سال اسلامی یکجہتی کھیڈاں دا انعقاد کیتا ویسی ۔ صدر ممنون حسین آکھے جو پاکستان اتے آذربائیجان خطے اچ امن، ترقی اتے خوشحالی کیتے کوششاں جاری رکھیسن۔ صدر ممنون حسین آپسی تجارت دے حجم کوں ودھاونڑ اُتے زور ڈتے ۔ انہاں آکھیا جو آذری سرمایہ کار پاکستان دی آزادانہ سرمایہ کاری اتے وڈی منڈی توں فیدہ چاون۔ آذربائیجان دے صدر آکھیا جو او پاکستان کوں آپنڑاں ڈوجھا گھر سمجھدے ہن اتے انہاں دا ملک پاکستان نال مختلف شعبیاں اچ دلچسپی رکھیندے ۔ انہاں آکھیا جو پاکستان اتے آذربائیجان خطے دی خوشحالی کیتے رل مل تے کم کریسن۔ صدر علیوف آکھیا جو ڈوہائیں ملک علاقائی اتے عالمی مسلیاں اُتے ہکو سنواں مو¿قف رکھیندے ہن ۔ایں توں پہلے ایوان صدر آمد اُتے صدر ممنون حسین آذربائیجان دے صدر دا استقبال کیتا۔ ایں موقعے تے روایتی لباس اچ ملبوس بالیں آذربائیجان دے صدر کو ںگلدستے پیش کیتے ۔ آذربائیجان دے وفد اچ وزیر خارجہ ایلمار میماد محمدوو، مشیر خارجہ ناروز میمادوو، وزیرِ اقتصادیات شاہین مصطفیو، وزیر توانائی ناطق علیو اتے پاکستان اچ سفیر علی فکرت اوگلو علیزادہ شامل ہن ۔
