اسلام آباد ۔ 19 فروری (اے پی پی) وفاقی وزیر خزانہ محمد اسحاق ڈار بئے پارلیمانی جماعتاں دے رہنماواں کوں ٹیلی فون کرتے ملک اچ فوجی عدالتاں دے کم کوں توسیع ڈیونڑ تے گالھ مہاڑ کیتی ۔ انہاں آکھیا جو ملک اچ دہشت گرداں دے حالیہ حملیاں توں پیدا تھیونڑآلی صورتحال دا تقاضا ہے جو ہک مربوط اتے بھرپور جواب ڈتا ونجے ۔ فوجی عدالتاں دے کم اچ توسیع دا فوری فیصلہ ملک اچ انسداد دہشت گردی ددیاں کوششاں کیتے بہوں اہم ہوسی ۔ اتھاں جاری تھیونڑآلی ہک پریس ریلیز دے مطابق وزیر خزاہ اسحاق ڈار اتوار کوں ایم کیو ایم دے قومی اسمبلی اچ پارلیمانی لیڈر فاروق ستار، عوامی نیشنل پارٹی دے غلام احمد بلور، جماعت اسلامی دے صاحبزادہ طارق اللہ، فاٹا دے شاہ جی گل آفریدی اتے عوامی مسلم لیگ دے شیخ رشید احمد سمیت بئے رہنماواں نال ٹیلی فون تے رابطہ کیتے انہاں سپیکر قومی اسمبلی سردار ایاز صادق کوں وی فون کرتے انہاں نال فوجی عدالتاں دے حوالہ نال بنڑائی گئی خصوصی پارلیمانی کمیٹی دا اجلاس پہلے سڈنڑ بارے مدد منگی ۔ انہاں آکھیا جو ایں بارے خصوصی کمیٹی دی تلویں کمیٹی دا اجلاس 22 فروری کوں سڈیا ونجے جڈانجو مین کمیٹی دا اجلاس 27 فروری دی بجائے 23 فروری کو ں تھیونڑاں چاہیدے ۔ انہاں مختلف رہنماوا ں نال گالھ مہاڑ دے دوران ایں عزم کوں دہرایا جو ملک اچ دہشت گرداں دے حالیہ حملیاں اُتے انہاں دے خلاف مربوط اتے بھرپور جواب لازمی ہے ۔
