اسلام آباد ۔پہلی مارچ (اے پی پی) اقتصادی تعاون تنظیم دے 13ویں سربراہی اجلاس اچ اقوام متحدہ دے چارٹر اتے اصولاں سیاسی آزادیسمیت ،خود مختاری اتے علاقائی اتحاد، ملکاں وچال دوستانہ گانڈھے اتے جھیڑے دے پُر امن حل اُتے کم کریندے راہونڑ دے عزم کوں دہرایا ہے ، ای سی او دے فعال کردار دے ذریعے درپیش مختلف مسلیاں کوں حل کرنڑ اتے خطے اتے ایندے لوکیں دے سانجھے فیدے اچ موقعے کوں استعمال اچ گھن آونڑ کیتے رل مل دے کم کیتا ونجے ، وزیراعظم پاکستان محمد نواز شریف دا شکریہ ادا کریندے ہوئیں آکھیا گئے جو انہاں دی اچ 13واں ای سی او سربراہ اجلاس کامیابی نال مُک گئے ۔ بدھ کوں 13ویں ای سی او سربراہ اجلاس اچ منظور کیتے گئے مشترکہ اعلامیے اچ آکھیا گئے جو اقتصادی تعاون تنظیم (ای سی او) دے رکن ملکاں دے براہان مملکت تے حکومت 13 ویں سربراہی اجلاس اچ ای سی او پروگراماں اتے منصوبیاں اُتے عملدرآمد اچ اگوہیں دی صورتحال دا جائزہ گھدا، اتے ای سی او خطے دے سانجھے مفاد دے علاقائی اتے عالمی امور اُتے گالھ مہاڑ کیتی ۔ سربراہی اجلاس دے شرکاءقرار ڈتا جو او ای سی او خطے اچ اقتصادی ترقی، مشترکہ خوشحالی، علاقائی اتحاد اتے امن و استحکام کیتے تنظیم دے اہداف تے مقاصد کوں عملی شکل ڈیونڑ کیتے آپنڑیں سیاسی خواہش اتے مضبوط عزم دا اعادہ کریندے ہئیں ۔ ای سی او دے اسلام آباد اعلامیے اچ آکھیا گئے جو تنظیم دی رکنیت سازی اچ توسیع دی سلور جوبلی پوری تھیونڑ نال ترقی کیتے علاقائی تعاون ودھاونڑ دے امکانات دا ہک نواں دور شروع تھئے ۔ اعلامیے اچ قرار ڈتا گئے جو ای سی او اچ توسیع اتے ایندے اچ دلچسپی رکھنڑآلے ملکاں کوں مکمل رکنیت ڈیونڑ دے نال نال مبصر دی حیثیت نال شمولیت دی خواہشمند ریاستاں اتے اداریاں دا وی خیرمقدم کیتا ویسی ، جیندے نال تنظیم اہمیت اچ ودھارا تھیسی ۔ سربراہی اجلاس اچ ازمیرمعاہدے دے اصولاں اتے مقاصد بارے عزم دا اعادہ کریندے ہوئیں مختلف معاہدیاں دے تحت تعاون دے فریم ورکس دی تیاری دی اہمیت اُتے زور ڈتا گئے ۔ اعلامیے اچ رابطہ کاری اُتے زورڈتا گئے جیندے اچ سائبر، توانائی، ریل، سڑکاں ، بندرگاہواں اتے جہاز رانی دے ذرائع شامل ہن ۔ اقتصادی تعاون تنظیم دے 13ویں سربراہی اجلاس دے اعلامیے اچ رکن ملکاں وچال تعلیمی تے سائنسی رابطیاں اتے ثقافتی تے عوامی سطح اُتے رابطیاں دی حوصلہ افزائی کیتی گئی ہے ۔ ای سی او خطے اچ وسیع تر رابطہ کاری اتے اقتصادی اتحاد کیتے مشترکہ جغرافیائی، تریخی تے ثقافتی اتے متنوع وسائل کو ں مکمل طور تے استعمال اچ گھن آونڑ دی لوڑ تے زور ڈتا گئے ۔ اعلامیے اچ علاقائی رابطہ کاری اتے اتحاد دی اہمیت کو ںاجاگر کریندے ہوئیں قرار ڈتا گئے جو ایندے نال رکن ملک رابطہ کاری اتے اتحاد دے مختلف پروگراماں توں حولے حولے فیدہ چاءسگن ۔ اسلام آباد اعلامیے اچ ای سی او خطے اچ اقتصادی تعاون کوں ودھاو نڑ سانگے تجارت دے ودھارے دے عزم کوں ظاہر کیتا گئے ۔ اعلامیے اچ ہر طرح دی انتہاءپسندی دا مقابلہ کرنڑ کیتے اعتدال پسندی دی اہمیت کوں تسلیم کریندے ہوئیں گالھ مہاڑ دے فروغ، آپسی احترام، مفاہمت تے سماجی ہم آہنگی اُتے زور ڈتا گئے جیندے نال ای سی او خطے اچ پائیدار اتے مجموعی ترقی، مساوی نمو، استحکام اتے خوشحالی دی راہ ہموار تھیسی ۔ سربراہ اجلاس اچ ای سی او خطہ اچ افغانستان دی اہمیت دا اعتراف کریندے ہوئیں افغانستان اچ تعمیرنو اتے پائیدار ترقی دے نال نال امن و سلامتی کیتے قومی، علاقائی اتے عالمی کوششاں دی حمایت جاری رکھنڑدا عزم ظاہر کیتا گئے ۔ اسلام آباد اعلامیے اچ ای سی او وژن 2025ءکوں اختیار کرنڑ دا خیرمقدم کیتا گئے جو ای سی او دے اندر بنیادی اصولاں اتے تعاون دے شعبیاں بارے ہک جامع دستاویز ہے۔
