کویت سٹی ۔ 06 مارچ (اے پی پی) وزیراعظم محمد نواز شریف آکھے جو 2013ءاچ جئیں ویلے حکومت سنبھالی تاں ملک کوں وڈے مسلیاں دا سامنڑاں ہئی ۔ اج اللہ دا شکر ہے جو حالات بہوں چنگے ہن ، 90ءدی دہائی دے منصوبے جاری راہندے تاں پاکستان ایشیئن ٹائیگر بنڑ چکیا ہوندا ، توانائی دا بحران ہنگامی بنیاداں تے حل کریندے پئے ہئیں ، کویت اچ پاکستانیاں دے مسلیاں اُتے امیر کویت نال گالھ کریساں ۔ سنوار کوں اتھاں پاکستانی کمیونٹی نال خطاب کریندے ہوئیں وزیراعظم آکھیا جو پاکستان ترقی تے خوشحالی آلے پاسے ودھدا پئے ، جڈاں اساں اقتدار سنبھالا تاں بجلی، دہشت گردی، معیشت دی طرح دے مسئلے ہن ۔ انہاں آکھیا جو میں 26 سال پہلے کویت آیا ہم ، اساں بھرپور طور تے کویت دا ساتھ ڈتے ، اﷲ اساڈے فیصلے کوں سرخرو کیتا، کویت آزادتھیا۔ انہاں آکھیا جو میں مرحوم کویتی امیر نال ملنڑ طائف گیا جنہاں نہ صرف پاکستان کوں ہر قسم دی مدد ڈیونڑ دا اظہار کیتا جڈانجو مدد پجائی ، ولی عہد دے نال وی چنگا تعلق ہئی ۔ انہاں آکھیا جو کویت پاکستان دا ہک چنگا دوست بنڑ گئے۔ انہاں آکھیا جو 90دی دہائی دے منصوبے آپنڑیں رفتار نال ٹُردے راہندے تاں اج پاکستان ایشیائی ٹائیگر بنڑ گیاں ہوندا۔ انہاں آکھیا جو 1991ءتوں 1993ءدی ڈھئی سال دی مدت اچ اساں پاکستان کوں ترقی دی ہک نویں راہ ڈیکھائی ۔ وزیراعظم آکھیا جو اساں آپ دے پہلے دور اچ وڈے منصوبے شروع کیتے ، اسلام آباد۔لہور اتے اسلام آباد۔پشاور موٹروے منصوبے کوں شروع کیتا، معیشت کو ںآزاد بنڑایا۔ چائنہ۔پاکستان اکنامک راہداری منصوبہ خطے دے ملکاں کیتے ہک گیم چینجر ہوسی ۔ انہاں آکھیا جو پہلے پاکستان اچ 16 گھنٹے توں ودھ دی لوڈ شیڈنگ ہوندی ہئی ، اساں بجلی دے بحران کوں مکاونڑ کیتے منصوبے بنڑائے، بھاشا اتے داسو ڈیم سمیت متبادل توانائی دے منصوبیاں اُتے کم شروع تھیا، بھاشا ڈیم، تربیلا اتے منگلا ڈیم توں ودی وڈا منصوبہ ہے جیندے نال 4500 میگاواٹ بجلی پیدا تھیسی ۔ ایں طرح داسو ڈیم توں وی 4500 میگاواٹ بجلی پیدا تھیسی ۔ وزیراعظم آکھیا جو گزریل کجھ سالیں دے دوران نظام اچ 16 ہزار میگاواٹ بجلی شامل تھئی اتے ایندے اچ آندے سالیں اچ بیا ودھارا تھیسی ۔ انہاں آکھیا جو اساں سستی بجلی پیدا کرنڑ دے منصوبے لیندے پئے ہئیں ، تھر دے کولے دے منصوبے اُتے کم شروع تھی گئے ، 2018ءتوں پاکستان اچ سستی بجلی ڈتی ویسی ۔ انہاں آکھیا جو توانائی بحران ہنگامی بنیاداں تے حل کریندے پئے ہن ، سی پیک اچ 50 ارب ڈالر دے منصوبیاں اُتے کم شروع تھی گئے ۔ پاکستان دے چپے چپے اچ ہائی ویز، سڑکاں، موٹرویز بنڑدیاں پن ۔ انہاں آکھیا جو اساں ریلوے دا درجہ ودھیندے پئے ہئیں ۔ کراچی توں پشاور تئیں ریلوے نظام اچ بہتری گھن آئی ویندی پئی ہے ۔ وزیراعظم آکھے جو حال ہی اچ پاکستان اچ ای سی او دا سربراہ اجلاس تھئے جیندے اچ رکن ملکاں دے رہنماوا ں اتفاق کیتے جو پاکستان نال رابطیاں اچ ودھارا کیتا ویسی ۔ انہاں آکھیا جو 2014ءاچ دہشت گردی دے خلاف آپریشن شروع کیتا، دہشت گرداں دی کمر تروڑی گئی ہے ۔ دہشت گردی کوں مکاونڑ کیتے جاناں ڈتیاں ہن ۔ انہاں آکھیا جو ہنڑ تی کہیں نہ کہیں طرح دہشت گردی سر چیندے پئے ہن جنہاں کوں کچل ڈتا گئے ۔ انہاں آکھیا جو لہور توں ملتان چھی لین موٹروے منصوبہ تکھے پورا تھی ویسی ۔ ایں طرح ملتان توں سکھر موٹروے دی تعمیر تھیندی پئی ہے ۔
