اسلام آباد ۔ 13 مارچ (اے پی پی) وزیرِ داخلہ چوہدری نثار علی خان نال برطانوی ہائی کمشنر تھامس ڈریو ملاقات کیتی۔ ملاقات اچ پاک برطانیہ گانڈھے اتے برطانوی ہوم سیکرٹری دے متوقع دورہ پاکستان بارے گالھ مہاڑ کیتی گئی ۔ وزارت داخلہ ولوں جاری بیان دے مطابق وزیر داخلہ آکھے جو ڈوہائیں ملکاں دی قیادت وچال موجودہ بہترین تعلقات توں فیدہ چیندے ہوئیں ڈو طرفہ تعاون کوں بیا ودھاونڑ سانگے اقدامات دی لوڑ ہے ۔ برطانوی ہوم سیکرٹری دا دورہ جتھاں ڈو طرفہ تعلقات کوں بیا مستحکم کرنڑ اچ مدد ڈیسی اتھاں ایں دورے نال ڈو طرفہ تعاون کوں وی ودھاونڑ اچ مدد ملسی ۔ وزیر داخلہ آکھے جو کجھ امور اچ پاکستان کوں تحفظات ہن ، امیدہے جو برطانوی ہوم سیکرٹری دے دورے نال انہاں تحفظات دے حل کرنڑ اچ مدد ملسی ۔ انہاں آکھیا جو سانجھے مفادات دے حصول اتے خطے دے امن کیتے ضروری ہے جو باہمی تجربے اتے قابلیت توں فیدہ چیندے ہوئیں ڈو طرفہ تعاون دا مضبوط اتے مربوط نظام رائج کیتا ونجے ۔
