اسلام آباد ۔ 17 اپریل (اے پی پی) وفاقی وزیر منصوبہ بندی ترقی واصلاحات احسن اقبال آکھے جو مئی 2017 ء اچ 00 36 میگاواٹ بجلی قومی گرڈ اچ رل ویسی ، جڈانجو مئی 2017 ء توںمئی 2018ء نیشنل گریڈ اچ 10ہزار میگاواٹ بجلی مرحلہ وارشامل کرڈتی ویسی ، بھکی پاور پلانٹ 20 اپریل کو ںپیداوار شروع کرڈیسی ، 2025ء تئیں پاکستان دا شمار دنیا دیاں 25 وڈیاں معیشتاں اچ تھیسی ، پاکستان ایں رفتار نال ترقی کریندا ریہا تاں 2030ء تئیں پاکستان دا شمار دنیا دیاں 20 مضبوط معیشتاں اچ ہوسی ، مادی وسائل اتے ذہنی سوچ دا درست استعمال ہی اساکوں ترقی دی راہ اُتے ٹورے رکھ سگدے ، موجودہ حکومت گزریل ترائے سالیں اچ 10ہزار میگاواٹ بجلی پیدا کرنڑدا ریکارڈ بنڑیندی پئی ہے ۔ اے گالہیں انہاں منصوبہ بندی کمیشن اچ پریس کانفرنس نال الیندے ہوئیں آکھیاں ۔ وفاقی وزیر آکھیا جو پاکستان کو ںاقتصادی لانگ مارچ دی لوڑ ہے جیندے کیتے ملک دیاں ساریاں سیاسی جماعتاں کوں حکومت دا ساتھ ڈیونڑاں چاہیدے ۔ انہاں آکھیا جو 2013ء دے مقابلے اچ 2017ء دا پاکستان بہتر ہے۔ امن و امان دی صورتحال چنگی تھئی ہے ، عالمی سرمایہ کار پاکستان ولے آندے ہن اتے پاکستان اچ سرمایہ کاری کریندے پئے ہن ۔ انہاں آکھیا جو پاکستان دنیا اچ ہک ابھردی ہوئی معیشت دے طور تے سامنڑیں آندا پئے ،جیکوں عالمی ادارے تسلیم کریندے پئے ہن۔ وفاقی وزیر آکھیا جو سی پیک پاروں ملک دی معدنی دولت کوں استعمال اچ گھن آونڑ دی کوشش کیتی ویندی پئی ہے ، سی پیک دے تحت توانائی اتے ڈھانچے دے منصوبیاں کوں عملی شکل ڈیونڑ دے بعد صنعتی تعاون دے مرحلے اچ داخل تھئے ہئیں ، جیندے نال روزگار دے موقعے ملسن ۔ انہاں آکھیا جو تھر اچ 400 سال تئیں بجلی پیدا کرنڑ کیتے کولے دے ذخیرے کوں پہلی واری استعمال اچ گھن آیا ویندا پئے ۔ احسن اقبال آکھیا جو گزریل ترائے سالیں اچ این 85 شاہراہ دا پرانڑاں منصوبہ پورا کر گھدا گئے ۔ لواری سرنگ دا بہوں تکھے افتتاح متوقع ہے، نیو انٹرنیشنل ایئر پورٹ اسلام آباد اگست تئیں کم شروع کرڈیسی ۔انہاں آکھیا جو گزریل سال زراعت دے شعبے اچ کپاہ پاروں پاکستان دا ترقی دا گراف گھٹ ریہے ، ایں سال حکومت زراعت دے شعبے کیتے ہک خصوصی پیکیج ڈتے ۔
