اسلام آباد ۔ 18 اپریل (اے پی پی) وزیر مملکت پانڑیں تے بجلی عابد شیر علی آکھیا ہے جوگڈو پاور پلانٹ تے گیس داپریشر گھٹ تھیونڑ دی وجہ توں 750 میگاواٹ بجلی گھٹ ہے جڈاں جونندی پور ، بکھی پاور پلانٹ تے کم دی وجہ توں 22 سومیگاواٹ بجلی سسٹم توں آﺅٹ ہے تاں جو ڈو ڈینھ تئیں ایں مسئلے کوں حل کر گھدا ویسی ۔ مارچ 2018اچ لوڈ شنگ دا خاتمہ تھی ویسی ۔ اپریشن دے ذریعے ملک اچ 90 فیصد دہشت گردی گھٹ تھی ہے ۔ منگل کوں پارلیمنٹ ہاﺅس دے باہروں میڈیا نال گالھ مہاڑ کریندے ہوئیں انہاں آکھیا جو چار پاور پلانٹ تے کم جاری ہے جیں نال 22 سو میگاواٹ بجلی سسٹم اچوں غائب ہے۔ نندی پور پاور پلانٹ کوں فرنس آئل توں گیس تے منتقل کیتا ویندا پیا ہے جیں اچوں 525 میگاواٹ بجلی سسٹم توںغائب ہے جڈاں جو گڈو پاور پلانٹ تے سوئی گیس دا پریشر گھٹ تھیونڑ دی وجہ توں750 میگاواٹ بجلی منصوبے توں گھٹ پیدا تھیندی پئی ہے ۔ وزیر مملکت آکھیا جو بکھی پاور پلانٹ کوں دسمبر 2017اچ پورا کر گھدا ویسی تے ایں ڈینھ پلانٹ کم شروع کر ڈیسی ، کجھ پاور پلانٹ تے مرمت داکم کیتا ویندا پیا ہے جیں دی وجہ توں پیداوار اچ گھٹکی تھی ہے ۔ وزیر مملکت آکھیا جوتاریخ اچ پہلی واری اپریل دے مہینے اچ ایں قدر گرمی ریکارڈ کیتی گی ہے ۔ انہاںآکھیا جوپاور پلانٹ چلنڑ نال ڈوڈینھ تئیں لوڈ شیڈنگ معمول تے آو یسی ۔ سندھ اچ ساریں توں ودھ بجلی چوری کیتی ویندی پئی ہے ۔ چار ہزار لوکاں دے خلاف مقدمات درج کرائے ، سندھ دے عوام کوں تعاون کرنڑاں چاہیدا ہے انہاں کوں قسطاں اچ بل ادا کرنڑ دا آکھیا گیا ہے مگرکوئی پیش رفت کائنی تھی ۔ انہاںآکھیا جو مارچ 2018اچ لوڈ شیڈنگ مک ویسی
