اسلام آباد ۔ 10 مئی (اے پی پی) مشیر خارجہ سرتاج عزیز آکھے جو افغانستان اتے ایران نال سرحدی انتظام دا استحکام اساڈی پہلی ترجیح ہے، پاکستان اتے افغانستان وچال بامعنی گالھ مہاڑ افغانستان اتے خطے اچ امن تے استحکام سانگے لازمی ہے ۔ تحریک طالبان اتے جماعت الحرار دیاں افغانستان اچ محفوظ پناہ گاہواں ہن ، افغان حکومت انہاں دہشت گرد تنظیماں دے خلاف کارروائی کرے، طالبان تشدد دا رستہ چھوڑ تے امن عمل اچ شامل تھی ونجن۔ پاکستان افغان حکومت اتے طالبان وچال مذاکرات کیتے مخلصانہ کوششاں کریندا پئے ۔ اے گالہیںانہاں بدھ کوں اتھاں افغانستان اچ امن بارے سیمینار نال الیندے ہوئیں اتے بعد اچ میڈیا دے نمائندیاں نال گالھ مہاڑ کریندے ہوئیں آکھیاں ۔ سرتاج عزیز آکھیا جو جنوری 2015ء اچ نیٹو دا جنگی مشن پورا تھیونڑ اتے افغان فورسز دی سیکورٹی دیاں ذمہ داریاں سنبھالنڑ دے بعد افغانستان اچ اوکھ اچ بہوں سارا ودھارا تھی گئے ۔ مسلسل جنگ اتے فوجی حکمت عملی دی ناکامی نال افغان فورسز اتے سویلین کوں بھاری جانی نقصان دا سامنڑاں کرنڑا ں پئے ۔ امن عمل اچ اگوہیں نہ ہونڑ نال داعش، منشیات دی سمگلنگ اتے بئے خطریاں اچ ودھارا تھی گئے ۔ ایں صورتحال نال نہ صرف افغانستان دے ہمسائے جڈانجو ساراخطہ متاثر تھینداپئے ، ہک پرامن اتے خوشحال افغانستان اساڈے فیدہ اچ ہے ۔ انہاں آکھیا جو دہشت گردی علاقائی اتے عالمی امن کیتے ساریاںتوں وڈا خطرہ ہے۔ جنوری 2014ء اچ آپریشن ضرب عضب دے بعد سارے ملک اچ دہشت گرد نیٹ ورک کوں کامیابی نال تباہ اتے قبائلی علاقیاں خاص طور تے شمالی وزیر ستان اچوں دہشت گرداں دا پوری طرح صفایا کرڈتا گئے ۔ امریکہ سمیت ساری دنیا انسداد دہشت گردی اچ اساڈیاں کامیابیاں کوں تسلیم کیتے ۔ انہاں آکھیاجو انہاں کامیابیاں کوں برقرار رکھنڑ کیتے افغانستان نال سرحدی انتظام دی لوڑ ہے ۔ مشیر خارجہ آکھیا جو پاکستان راہداری معاہدے تے تحت آپ دیاں بندر گاہواں دے ذریعے بغیر کہیں رکاوٹاں دے افغانستان کوں راہداری تجارت دیاں سہولتاں ڈتیاں ہن ۔ ایں معاہدے اُتے نظر ثانی تھیسی ۔ ایں بارے افغانستان پاکستان راہداری معاہدہ کوآرڈینیشن اتھارٹی دا اجلاس بہوں تکھے سڈیا ویسی ۔ سرتاج عزیز آکھیا جو پاکستان گزریل چار ڈھاکیاں توں لکھاں افغان مہاجراں دی میزبانی کریندا پئے ۔ ڈو طرفہ امدادی پیکیج دے تحت پاکستان افغانستان اچ 500 ملین ڈالر دے منصوبے پورے کیتے ہن اتے ترائے ہزار افغان طالب علماں کوں پاکستانی تعلیمی اداریاں اچ سکالر شپس ڈتے ہن ۔ گزریل سال برسلز کانفرنس اچ پاکستان افغانستان کوں ترقیاتی منصوبیاں کیتے بئے 500 ملین ڈالر امداد ڈیونڑ دا وعدہ کیتا ہے ۔
