اج دا پاکستان ودھ مضبوط اتے مستحکم ہے، اساں پاکستان دی عوام کوں جواب دہ ہوں ، اساڈے دور اچ سیکورٹی دی صورت حال بہتر تھی ہے
اسلام آباد ۔ 26 مئی (اے پی پی) وزیراعظم محمد نواز شریف آکھیا ہے جو مسلم لیگ (ن) اقتدار دی نی بلکہ اقدار دی سیاست کریندی ہے،اج دا پاکستان ودھ مضبوط اتے مستحکم ہے۔لوک ڈیکھدے پے ہن جو کم کون کریندا پیا ہے تے کیں کجھ نی کیتا ۔اساں پاکستان دی عوام کوں جواب دہ ہوں ۔انہاں اے گالھ جمعے کوں پاکستان مسلم لیگ ن دی پارلیمانی پارٹی دے اجلاس دی صدارت کریندے ہوئیں آکھی ۔وزیراعظم آکھیا جو اساڈی حکومت کوں 2013اچ ودھ سارے مسئلے ورثے اچ ملیے لیکن اساں ودھ ساری محنت کیتی تے ہنڑ لوک ڈیکھ سگدے ہن جو ترقی دے منصوبے شفاف انداز اچ تکھے پورے کیتے ویندے پے ہن انہاں آکھیا جو ماضی اچ ترقی دے منصوبے تاخیر دا شکار تھیندے ہن جیں نال عموما لاگت ودھ ویندی ہئی لیکن ہنڑ مصنوبہ جات تے بچت کیتی ویندی پئی ہے ،وزیراعظم آکھیا جو پاک چین اقتصادی راہداری دے تحت ۔منصوبے پورے کیتے ویندے پے ہن ۔آندے کجھ مہینے اچ 3600میگاواٹ بجلی دا مزید ودھارا تھی ویسی ،اساںپاکستان سانگے پائیدار توانائی وسائل دی محفوظ بنیاد فراہم کرنڑ سانگے کوشاں ہوں ۔انہاں آکھیا جو پاکستان دی تاریخ اچ ہک ہزار ارب روپے دا ترقیاتی بجٹ بے مثال ہے ۔اساں گورننس اصلاحات تے کم کریندے پیوں جیرھا جو معاشرے دی مختلف طبقات توں مخالفت دے نال نال ہک طویل عمل ہے لیکن اساں مثبت اصلاحات سانگے پر عزم ہوں ۔
