اسلام آباد ۔05 مئی (اے پی پی)چمن اچ افغان بارڈر پولیس دی مردم شماری دے عملے دی حفاظت تے مامور ایف سی اہلکاراں تے فائرنگ نال ہک بندہ شہید تے 4 ایف سی اہلکاراں سمیت 18 بندے زخمی تھی گے ہن۔ پاک فوج دے شعبہ تعلقات عامہ (آئی ایس پی آر)دے مطابق جمعے دی سویل چمن اچ افغان بارڈر پولیس مردم شماری دے عملے دی حفاظت تے مامور فرنٹیئر کانسٹیبلری (ایف سی) دے اہکاراں تے اندھا دھند فائرنگ کر ڈتی جیں پاروںہک بندہ شہید اتے4 ایف سی اہلکاراں،تریمتاں تے بالاں سمیت 18 بندے زخمی تھی گے ہن ،فائرنگ نال ہک گھر کوں وی ضیان تھیا ہے ۔آئی ایس پی آردے مطابق افغان حکام کوں علاقے اچ جاری مردم شماری بارے ویلھے نال اطلاع ڈتی گی ہئی تے ایں حوالے نال ڈوہیں ملکاں وچال فوجی تے سفارتی سطح تے وی رابطے قائم ہن ایندے باوجود افغان فورسز ولوں فائرنگ کیتی گی ۔چھیکڑی اطلاعات تئیں چمن اچ پاک افغان سرحد تے فائرنگ دا تبادلہ جاری ہے اتے چمن کراسنگ پوائنٹ بند کرڈتا گیا ہے ۔آئی ایس پی آر دے مطابق افغان بارڈر پولیس 30 اپریل توں پاک افغان سرحد تے واقع دیہات کلی لقمان اتے کلی جہانگیر اچ مردم شماری اچ رکارٹاں پیدا کریندی پئی ہے ۔زخمی تھیونڑ آلیں اچ4 ایف سی اہلکار،3 بال تے ترائے تریمتاں شامل ہن ۔ زخمیاں کوںکوئٹہ تے چمن سول ہسپتال جڈاں جوایف سی اہلکاراں کوں سی ایم ایچ منتقل کیتا گیا ہے ۔ہسپتال ذرائع دے مطابق زخمیاں توں 3 دی حالت تشویشناک ڈسائی ویندی ہے ۔
