اسلام آباد۔ 08 جون (اے پی پی) پاکستان آکھیا جو پاک افغان تعلقات کوں سبوتاژ کرنڑ سانگے بھارت افغانستان اچ ریاستی دہشت گردی کوں ودھیندا پئے ،دہشت گردی دی لعنت دے خاتمہ سانگے پاکستان اتے افغانستان کوں قریبی رابطیاں کوں ودھاونڑاں پمسی،شنگھائی تعاون تنظیم دے ڈو ڈینھ دے اجلاس اچ پاکستان تنظیم دا مکمل رکن بنڑ ویسی۔پاکستان کوں مشرق وسطیٰ دی اجوکی صورتحال تے گھاٹی تشویش اے،اقوام متحدہ دی سلامتی کونسل اتے انسانی حقوق دی تنظیماں مقبوضہ کشمیر اچ بھارتی فوج ولوں انسانی حقوق دی پامالیاں دا نوٹس گھنن۔اے گالھ دفتر خارجہ دے ترجمان نفیس زکریا خمیس کوں ہفتہ وار پریس بریفنگ ڈیندیں ہوئیں آکھی۔ترجمان آکھیا جو افغانستان گزریل 40سالیں توں بحران اچ خانہ جنگی دا شکار اے اتے ایں صورتحال پاروں دہشت گرداں کوں اتھاں رہنڑ دی جاہ ملی ،دہشت گردی پاروں افغانستان دی عوام کوں بہوں اوکھ دا سامنڑاں کرنڑاں پئےے،اینویں پاکستان دی عوام کوں وی دہشت گردی توں بہوں تکلیف چاونڑی پئی اے۔ترجمان آکھیا جو عدم استحکام دا شکار افغانستان ساریاں توں ودھ پاکستان کوں متاثر کریسی،پاکستان افغاناں دی قیادت اتے سرپرستی اچ امن عمل دی حماےت کریندے۔
