اسلام آباد۔ 3 جون (اے پی پی) وزیر اعظم دے معاون خصوصی برائے سیاسی امور ڈاکٹر آصف کرمانی آکھے جو وزیر اعظم محمد نواز شریف اقتدار نہیں اقدار دی سیاست اُتے یقین رکھیندے ہن او ملک دے بقاءدی جنگ لڑدے پئے ہن ۔ مسلم لیگ (ن)ہمیشہ عدالتاں دا احترام کیتے اتے اگوں تے وی کریندی راہسی ۔ مسلم لیگ (ن)دی حکومت عوام دی منتخب حکومت ہے،اساڈے نال انصاف ہونڑاں چاہیدے ، اساں پاکستان دے عام شہری ہئیں اساکوں وی انصاف ملنڑاں چاہیدے ، جیکر محسوس تھیاجو جے آئی ٹی قنون توں ہٹ تے سلوک کریندی پئی ہے تاں اسادا آئینی اتے قنونی حق ہے جو اساں اعلیٰ عدالتاں دا دروازہ کھڑکاﺅں ، اتے میڈیااتے عوام نال وی رابطہ کرو ں۔ عمران خان تاں ترائے سالیں دا حساب کائنی ڈے سگے اساں تاں 70سالاں دا حساب ڈیندے پئے ہئیں ۔ فیصلہ آونڑ دے بعد وزیر اعظم محمد نواز شریف انہاں دا ٹبر اتے مسلم لیگ (ن)سرخرو تھیسی ، اتے مخالفاں کوں لُکنڑ دی جاہ کائناں ملسی ۔ انج اساڈے اُتے گالہیں کرنڑ آلیاں کوں علم ہونڑ دے باوجود محترمہ بے نظیر بھٹو دے قاتلاں کوں گرفتار کائنی کر سگے ۔ اے گالہیں انہاں چھنڑ چھنڑ کوں وزیر اعظم محمد نواز دے پُتر حسین نواز دی چوتھی واری جے آئی ٹی اچ پیشی دے موقعے تے فیڈرل جوڈیشل اکیڈمی دے باہر صحافیاں نال گالھ مہاڑ کریندے ہوئیں آکھیاں۔ ایں موقعے تے وزیر مملکت برائے کیڈ ڈاکٹر طارق فضل چوہدری ،میئر اسلام آباد و چیئرمین سی ڈی اے شیخ عنصر عزیز ڈپٹی میئر اسلام آباد ذیشان شاہ سمیت بئے کارکن وی موجود ہن ۔
