اسلام آباد ۔ 14 اگست (اے پی پی)صدر مملکت ممنون حسین اتے چین دے نائب وزیر اعظم وینگ یینگ نے آکھیا جو علاقائی امن و استحکام اتے ترقی کیتے پاکستان اتے چین دے درمیان تعاون جاری رہسے اتے ڈوہاں ملک انسانیت دی ترقی اتے خوشحالی کیتے رل تے کم کریندے رہسن،ڈوہاں ملکاں نے پاک چین اقتصادی راہداری منصوبے دی جلد تکمیل تے وی زور ڈتا ۔ڈوہاں رہنماواں دے درمیان اے اتفاق رائے پیر کوں ایوان صدر اچ ہوونڑ الی ملاقات اچ تھیا۔ملاقات اچ ڈوہاں ملکاں دے وفود وی شامل ہن ۔صدر مملکت نے پاکستان دے یوم آزادی 70ویں سالگرہ دی تقریبات اچ اعلیٰ ترین سطح تے چین دی شرکت تے معزز مہماناں دا شکریہ ادا کریندے ہوئے آکھیاجو ایں نال ڈوہاں ملکاں دے پرخلوص رشتے دا اندازہ تھی گے ۔انہاں نے آکھیا جو ڈوہیں ملک ڈکھ سکھ دے ہر ویلے ہک ڈوجھے دے کم امدے ہن جو دنیا واسطے ہک مثال اے ۔صدر مملکت نے آکھیا جو پاکستان تمام اہم امور اچ چین دی حمایت کریندے ۔انہاں نے حال اچ چینی سرزمین تے بھارتی مداخلت تے تشویش دا اظہار کریندے ہوئے آکھیا جو ایں موقع تے چین نے جیڑھے تحمل دا مظاہرہ کیتے او قابل تعریف اے ۔انہاںنے مزید آکھیا جو پاکستان ،تائیوان ،تبت ،سنکیانگ اتے ساﺅتھ چائنا سی سمیت تمام معاملات اچ چین دی مکمل حمایت کریسے ۔صدر مملکت نے آکھیا جو پاکستان چین دے تعاون تے دہشت گردی دے خاتمے کیتے کم جاری رکھیسے ۔انہاں نے مزید آکھیا جو افغانستان اچ امن کیتے چین دا کردار قابل تحسین اے اتے اساں توقع کریسوں جو انہاں کوششاں دے مثبت نتائج ہوسن تے مسئلے جلدی حل تھی ویسن ۔انہاںنے آکھیا جو پاکستان بھارت دے نال جموں و کشمیر سمیت تمام متنازعہ مسائل تے گالھ مہاڑ دے ذریعے حل چاہندے ۔انہاں نے آکھیا جو او چین دے وزیر اعظم دے دورہ پاکستان واسطے منتظر اوں ۔چین دے نائب وزیراعظم وونگ یانگ نے ایں موقع تے آکھیا جو پاک چین دوستی مفادات اتے سیاسی مصلحتاں توں بالا تر اے ۔انہاں نے آکھیا جو دہشت گردی کے خاتمے کیتے پاکستان نے اپنڑے حالات دے مطابق سوہنڑاں کم کیتے ۔ جیں دی وجہ توں خطے دے سارے ممالک دے مقابلے اچ پاکستان دی صورتحال بہتر اے ۔پاکستان کو ں چین دا تعاون یکا ملسے ۔انہاں نے آکھیا جو صدر مملکت نے یوم آزادی دی تقریب اچ شاندار تقریر کیتی جیں توں قومی اتحاد کو فروغ ملسے اتے ترقی دی رفتار تیز تھیسے ۔معزز مہماناں نے آکھیا جو پاک چین اقتصادی تعاون اچ اضافہ حوصلہ افزائی اے ۔ایندی رفتار تے حجم اچ اضافہ تھیندا ویسے ۔انہاں نے آکھیا جو چین کیتے پاکستان دی برآمدات اچ اضافہ کیتا ویسے ۔پاک چین دوستی اقوام عالم کیتے ہک مثال اے ۔
