اسلام آباد ۔ 12 ستمبر (اے پی پی) الیکشن کمیشن واضح کیتا ہے جو حلقہ این اے 120لاہور اچ تھیونڑ آلے ضمنی انتخاب اچ کہیں ووٹر دی بائیو میٹرک تصدیق نہ تھیونڑ دی صورت اچ اینکوں ووٹ دے حق توں محروم کائناں کیتا ویسی ،مذکورہ حلقے اچ بائیو میٹرک مشیناں دا استعمال صرف تجرباتی بنیاداں تے کیتا ویندا پیا ہے ،ایندا الیکشن دے قانونی مرحلے تے رزلٹ تے کوئی اثر کائناں تھیسی ۔ترجمان الیکشن کمیشن دے مطابق کجھ حلقے دے تاثر ڈیندے پے ہن جو جیرھے ووٹراں دی بائیو میٹرک تصدیق نہ تھی سگی تاں او ووٹ دے حق توں محروم تھی ویسن جڈاں جو اے تاثر بالکل غلط تے بے بنیاد ہے ۔مذکورہ حلے اچ سارے 321,786 ووٹر ز اپنڑاں ووٹ دا حق چنگے طریقے نال 17ستمبر کوں استعمال کریسن تے بائیو میٹرک مشین جیرھی جو صرف 39پولنگ سٹیشن تے تجرباتی طور تے استعمال کیتی ویندی پئی ہے انہاں دا الیکشن دے عمل دے نتیجے تے کوئی اثر کائناں تھیسی ۔ پارلیمانی ریفارمز کمیٹی دی سفارشات دے مطابق الیکشن کمیشن سارے ضمنی انتخابات اچ بائیومیٹرک مشیناں دا استعمال صرف آزمائشی بنیاداں تے کریندا پیا ہے تاں جو انہاں مشیناں دی کاکردگی دا جائزہ گھدا ونج سگے تے آندے عام انتخابات سانگے ایندی تکنیکی بنیاداں تے جانچ پڑتال کیتی ونج سگے ۔مذکورہ حلقے اچ کوئی وی ووٹر بائیو میٹرک مشین دی وجہ توں ووٹ دے حق توں محروم کائنی کیتا ویندا پیا ۔ترجمان میڈیا توں پر زور اپیل کیتی جو ایں وضاحت نال لوکاں دے وسیع تر مفاد سانگے پوری میڈیا کوریج ڈیون تاں جو کہیں وی پاکستانی دے ذہن اچ انہاں متعلق کوئی بے بنیاد گالھ دا غیر ضروری مسئلہ نہ کھڑا کیتا ونجے ۔
