پاکستان دا سلامتی کونسل دیاں قراردادوں تے عملدرآمد سانگے اقدامات دا مطالبہ
مسئلہ کشمیر دے منصفانہ اتے پرامن حل سانگے اقوام متحدہ دا خصوصی نمائندہ مقرر کیتا ونجے ، بین الاقوامی برادری صورتحال کوں خطرناک تھیونڑ توں بچاونڑ سانگے فیصلہ کن کردار ادا کرے ،بھارتی جرائم دی بین الاقوامی تحقیقات کیتیاں ونجن ،بھارت کشمیریاں کوں دباونڑ سانگے طاقت دا اندھا دھند استعمال کریندا پیا ہے ،بد قسمتی نال اقوام متحدہ دے چارٹر تے عمل در آمد کائنی تھیا ،پاکستان کوںمشرقی سرحد توں ہمیشہ خطرہ رہیا ہے ،افغانستان اچ گزریل 16سال توں جاری جنگ دا ہک حل مذاکرات ہن ،طالبان تے محفوظ ٹھکانڑیں پاکستان اچ اچ کائنی افغانستان اچ اہن ،
اقوام متحدہ ۔ 22 ستمبر (اے پی پی) پاکستان کشمیر دے حوالے نال اقوام متحدہ دی سلامتی کونسل دیاں قرار داداں تے عمل در آمد سانگے اقدامات دا مطالبہ کریندے ہوئیں آکھیا ہے جو مسئلہ کشمیر دے منصفانہ تے پر امن حل سانگے اقوام متحدہ دا خصوصی نمائندہ مقرر کیتا ونجے ،بین الاقوامی برادری صورت حال کوں خطرناک تھیونڑ توں بچاونڑ سانگے فیصلہ کن کردار ادا کرے ۔خمیس کوں اقوام متحدہ دی جنرل اسمبلی دے 72ویں اجلاس توں خطاب کریندے ہوئیں وزیراعظم شاہد خاقان عباسی بھارت دے قبضے کشمیر اچ اپنڑے حق خود ارادیت دے حصول سانگے جدو جہد کرنڑ آلے نہتے عوام تے ظلم تے ودھ ساری تشویش دا اظہار کریندے ہوئیں آکھیا ہے جو بھارت کشمیریاں کوں دباونڑ سانگے طاقت دا اندھا دھند استعمال کریندا پیا ہے ،تریمت ،بالاں تے نینگراں کوں بلا امتیاز نشانہ بنڑایا ویندا پے ۔ہزاراں دی تعداد اچ نشوم کشمیری مارے گے ہن تے زخمی تھے ہن ۔شارٹ گن پیلٹ نال بالاں سمیت ہزاراں دی تعداد اچ کشمیری اپنڑی نظر توں محروم یا معذور تھی گے ہن ۔ایں طرح دے بئے ظلم جینوا کنونشن دی خلاف ورزی تے جنگی جرائم دے زمرے اچ آندے ہن ۔وزیراعظم اپنڑے خطاب اچ جنگ نال تباہ حال افغانستان اچ امن سانگے پاکستانی خواہش ،پاکستان دی انسداد دہشت گردی سانگے کوششاں تے قربانیاں ،مشرق وسطی اچ صورت حال ،اقوام متحدہ اچ اصلاحات ،ماحولیاتی تبدیلی ،پاکستان اچ جمہوریت تے معاشی استحکام تے وی گالھ مہاڑ کیتی ۔انہاں ہمسایاں دے نال امن دے نال رہنڑ دی پاکستان خواہش دا اظہار کریندے ہوئیں آکھیا ہے جو پاکستان بھارت دے نال کشمیر سمیت سارے پرانڑیں جھیڑے دے حل سانگے جامع مذاکرت دی بحالی تے امن تے سلامتی کوں برقراررکھنڑ سانگے اقدامات تے گالھ مہاڑ کرنڑ چاہندے تاں جو انہاں آکھیا انہاں مذاکرات سانگے بھارت کوں پاکستان دے خلاف ریاستی پشت پناہی نال کیتی ونجنڑ آلی دہشت گردی ،پاکستان دے خلاف تخریب کاری دی مہم توں اجتناب کرنڑاں ہوسی ۔کشمیر دی صورت حال دا ذکر کریندے ہوئیں وزیراعظم شاہد خاقان عباسی جنر ل اسمبلی دے اجلاس اچ شریک دنیا دے اعلیٰ سطح وفد کوں ڈسایا جو بھارت مقبوضہ کشمیر اچ کشمیریاں کوں انہاں دے حق خود ارادیت توں محروم کرنڑ تے جدوجہد آزادی کوں دباونڑ سانگے 7لکھ فوج تعینات کر رکھی ہے ۔
