اسلام آباد ۔ 5 ستمبر (اے پی پی) کیپیٹل ایڈمنسٹریشن اینڈ ڈویلپمنٹ ڈویژن (کیڈ) وزیراعظم دے تعلیمی اصلاحات پروگرام دے تحت وفاقی دارالحکومت دے سکولاں اچ استاداں دی حاضری دی مانیٹرنگ سانگے ایریا فیلڈ افسر کوں ٹیبلٹس فراہم کریسی ۔ وزارت کیڈ دی پارلیمانی سیکر ٹری مائزہ حمید ”اے پی پی“ کوں ڈسایا جو انہاں ٹیبلٹ دے ذریعے ایریا ایجوکیشن افیسرز استاداں دی حاضری دے نال نال طالب علماں دی حاضری وی مانیٹر کریسن ۔انہاں آکھیا جو ایں اقدام دا مقصد سرکاری تعلیمی اداریں اچ معیاری تعلیم کوں یقینی بنڑاونڑاں ہے ۔ مائزہ حمید آکھیا جو وزیراعظم دے تعلیمی اصلاحات پروگرام دے تحت جدید ٹیکنالوجی دے استعمال دا مقصد 100 فیصد حاضری کو ںیقینی بنڑاونڑاں ہے جیں نال تعلیمی اداریں دے معیار اچ ودھارا تھیسی ۔ انہاں آکھیا جو وزیراعظم دا تعلیمی اصلاحات پروگرام وفاقی دارالحکومت اچ کامیابی نال جاری ہے۔ ایں پروگرام دے تحت وفاقی دارالحکومت دے 422 تعلیمی اداریں کوں اپ گریڈ کرنڑاں ہے۔ ایں سلسلے اچ پہلے مرحلے اچ 22 سکولاں کوں اپ گریڈ کیتا گیا، ڈوجھے مرحلے اچ 200 سکولاں کوں اپ گریڈ کیتا ویندا پیا ہے جڈاں جو تریجھے مرحلے اچ مزید 200 سکولاں کوں اپ گریڈ کیتا ویسی۔
