اسلام آباد ۔ 24 اکتوبر (اے پی پی) وزیر داخلہ احسن اقبال آکھیا ہے جو معیشت دی بہتری تے استحکام نال انسانی سمگلنگ دے مسلیں تے قابو پاونڑ اچ مدد ملی ہے ،اساں ہر قسم دی سمگلنگ کوں روکنڑ سانگے پر عزم ہوں ۔او منگل کوں مقامی ہوٹل اچ اقوام متحدہ دے منشیات تے جرائم کوں روکنڑ متعلق ادارے یو این او ڈی سی دے اہمتام نال کانفرنس توں خطاب کریندے پے ہن ۔اپنڑے خطاب اچ وزیر داخلہ آکھیا جو حکومت پاکستان انسانی سمگلنگ دی روک تھام سانگے پر عزم ہے ۔وزیر داخلہ آکھیا جو ہر انسان دا حق ہے ا و اپنڑی مرضی نال زندگی گزارے ۔انہاں آکھیا جو بے روزگاری تے عدم استحکام ایں مسئلے دی وڈی وجوہات ہن ۔انہاں آکھیا جو کانفرنس دی سفارشات ایں مسئلے دے حل اچ مثبت رہنمائی ڈیسن ۔انہاں آکھیا جو پاکستان گزریل ترائے سال اچ معاشی طور تے بہتر پاسے ٹردا پے تے معیشت دی بہتری تے استحکام نال انہاں مسلیں تے قابو پاونڑ اچ وی مدد ملی ہے ۔وزیر داخلہ آکھیا جو پاکستان تے افغان جنگ دی باری قیمت ادا کیتی ہے ایں جنگ دے نتیجے اچ پاکستان دہشت گردی تے سمگلنگ دی لہر آئی ۔افغان جنگ دے بعد نائن الیون دے واقعے دے بعد وی پاکستان کوں ضیا ن تھیا ہے ۔وزیر داخلہ آکھیا جو پاکستان 30لکھ توں ودھ افغان مہاجراں دی ڈیکھ بھال کریندا پیا ہے ۔انہاں آکھیا جو عالمی طاقتاں سابق سوویت یونین دے خلاف کامیابی حاصل کرنڑ دے بعد اساکوں بے یارو مددگار چھوڑ گیاں ۔ سینیٹ دی قائمہ کمیٹی دفاع تے سی پیک دے چیئرمین سینیٹر مشاہد حسین سید کانفرنس توں خطاب کریندے ہوئیں آکھیا ہے جو انسانی سمگلنگ دے مسلے کوں وسیع تناظر اچ ڈیکھنڑاں چاہیدا ہے ۔انہاں آکھیا جو معاشی ترقی تے خوشحالی نال ایندے مسلے تے قابو پاونڑ اچ مدد مل ویسی ۔ ایں موقع تے ڈائریکٹر جنرل ایف آئی اے بشیر احمدآکھیا جو ایف آئی اے انسانی سمگلنگ دی روک تھام سانگے عالمی برادری دیاں کوششاںدا حصہ ہے۔
