اسلام آباد ۔ 9 نومبر (اے پی پی) وزیر مملکت اطلاعات و نشریات مریم اورنگزیب کوئٹہ دھماکے دی ودھ ساری مذمت کیتی ہے ۔خمیس کوں اپنڑے ہک بیان اچ مریم اورنگزیب آکھیا جو پاکستان دی پولیس ،مسلح فوج تے قانون نافذ کرنڑ آلے اداریں دے نینگراں تے افسر اپنڑاں سینہ سامنڑے رکھ تے پاکستان عوام دے جان مال تے تحفظ تے قوم دی سلامتی سانگے قربانیاں ڈیندے پن ،انہاں دیاں لازوال قربانیاں دی داستان تاریخ دے اوراق تے سنہری حروف نال لکھیاں ویسن ۔وزیرمملکت آکھیا جو پوری قوم دہشت گردی دے خلاف ہک مٹھ ہے ،دہشت گرداں دیاں ایجھیاں ڈراونڑیاں کاروائیاں پاکستانی قوم دے عزم کوں متزلزل نی کر سگدیاں ،پاکستان تے ایندی ترقی دے دشمن اپنڑے مذموم مقاصد اچ ہمیشہ ناکام رہ ویسن ۔مریم اورنگزیب آکھیا جو اساں چھیکڑی دہشت گرد دے خاتمے تئیں آرام نال نہ بہسوں ۔وزیر مملکت اطلاعات مریم اورنگزیب متاثرہ خانداناں نال ہمدردی دا اظہار کیتا تے انہاں زخمیاں وی وختی چنگی صحت سانگے دعا کیتی ۔
